Ambasadori amerikan në Izrael, Mike Huckabee, ka shkaktuar polemika pasi në një intervistë për BBC sugjeroi që shtetet muslimane të japin tokë për krijimin e një shteti palestinez, në vend që ai të vendoset në territoret e pushtuara nga Izraeli.
“Vendete muslimane kanë 644 herë më shumë tokë sesa Izraeli,” tha Huckabee. “Prandaj, nëse ekziston një dëshirë e tillë për shtetin palestinez, ndoshta dikush do të thotë: ‘Ne do të donim ta strehojmë atë’.”
Huckabee e cilësoi zgjidhjen me dy shtete – formulën e mbështetur nga komuniteti ndërkombëtar për një zgjidhje paqësore – si “një synim aspirativ”. Në një intervistë tjetër për Bloomberg, ai shtoi se SHBA nuk po ndjek më qëllimin për krijimin e një shteti të pavarur palestinez.
Zëdhënësja e Departamentit të Shtetit, Tammy Bruce, më vonë theksoi se “ambasadori flet në emër të vet”, duke shtuar se vetëm presidenti përcakton politikën zyrtare amerikane për Lindjen e Mesme.
Kundërshtim ndaj konferencës për shtetin palestinez
Huckabee kritikoi gjithashtu një konferencë të planifikuar në OKB këtë muaj, e organizuar nga Franca dhe Arabia Saudite, për të hartuar një plan drejt shtetësisë palestineze. Ai e quajti konferencën “të papërshtatshme dhe të gabuar” dhe tha se përpjekjet ndërkombëtare për të imponuar një zgjidhje gjatë luftës në Gaza do ta bënin Izraelin “më pak të sigurt”.
“Pse duhet medoemos të jetë në të njëjtën tokë me Izraelin?” pyeti ai, duke vënë në dyshim premisën bazë të zgjidhjes me dy shtete.
Kur u pyet nëse SHBA po përjashton mundësinë e një shteti palestinez në Bregun Perëndimor, Huckabee tha: “Nuk do të thosha se nuk mund të ndodhë kurrë, por kultura duhet të ndryshojë. Aktualisht, është një kulturë ku është në rregull të sulmosh dhe vrasësh hebrenj dhe të shpërblehesh për këtë.”
Zëri i një “Izraeli të madh”
Huckabee është mbështetës i idesë për një “Izrael të madh” dhe e ka quajtur Bregun Perëndimor me termin biblik “Judea dhe Samaria”. Qëndrimet e tij janë të ngjashme me ato të ministrave ultra-nacionalistë izraelitë, që duan kontroll të përhershëm mbi territoret e pushtuara dhe kanë sugjeruar që shteti palestinez të krijohet në ndonjë vend arab.
Sipas grupeve të të drejtave të njeriut dhe qeverive europiane, kjo do të përbënte shkelje flagrante të së drejtës ndërkombëtare, nëse do të zbatohej.
Kritika ndaj sanksioneve ndaj ministrave izraelitë
Ambasadori kritikoi ashpër vendimin e disa vendeve perëndimore – përfshirë Britaninë, Kanadanë dhe Australinë – për të sanksionuar ministrat izraelitë të ekstremit të djathtë Itamar Ben-Gvir dhe Bezalel Smotrich, për “nxitje të vazhdueshme të dhunës kundër palestinezëve”.
Huckabee e quajti këtë një “vendim tronditës”, duke thënë: “Nuk kam dëgjuar ende një arsye të mirë pse këta ministra të zgjedhur janë sanksionuar nga vende që duhet të respektojnë sovranitetin e Izraelit.”
Konteksti i luftës në Gaza
Lufta në Gaza nisi pas sulmit të Hamasit në tetor 2023, ku u vranë rreth 1,200 persona dhe 251 të tjerë u morën peng në Izrael. Që prej atëherë, sipas Ministrisë së Shëndetësisë në Gaza të kontrolluar nga Hamasi, janë vrarë mbi 54,900 palestinezë, mbi një e katërta prej të cilëve fëmijë, sipas OKB-së. Aktualisht, 56 pengje mbeten në Gaza, me rreth 20 që besohet se janë ende gjallë. /mesazhi
