12.6 C
Pristina
Thursday, March 28, 2024

GHB, droga e fundit e përhapur në Prishtinë

Më të lexuarat

Fakti se në Kosovë shumë të rinj përdorin substance narkotike mbetet shqetësues.

Sipas statistikave të organizatave joqeveritare që merren me këtë problematikë, vetëm në shkolla 20 për qind e nxënësve përdorin lloje të ndryshme të këtyre substancave. E, mosha më e re e nxënësve që përdor këtë substancë është 12 vjeçe. Kjo problematikë është ngritur edhe në Kuvendin e Kosovës nga Burim Ramadani, deputet nga radhët e Aleancës për Ardhmërinë e Kosovës, në seancën e 20 dhjetorit.

Por, kohëve të fundit në treg po hyjnë lloje të reja të drogave, të cilat sipas zyrtarëve shëndetësorë, janë me rrezikshmëri të lartë.

Substanca narkotike më e re në treg, e quajtur GHB (Hydroxybutyric acid), po përdoret nga të rinjtë në masë të madhe. Për një gjë të tillë na tregon Mirlinda, një e re, e cila po ballafaqohet me pasojat e kësaj droge që e përdor vëllai i saj.

Ajo shpjegon për ndikim e GHB-së në organizmin e njeriut, si dhe pasojat që po i sjell kjo substancë narkotike:

“Droga GHB është përhap shumë sidomos në Prishtinë. Nëse del në kafeteri e vëren që ka shumë njerëz që janë të ndikuar prej asaj droge. Ndikimi i drogës GHB në organizëm vërehet nga sjelljet e shthurura të personit. Kam lexuar që ndikon si afrodiziak në trurin e njeriut, andaj edhe ka shenja të vulgaritetit seksual. Konsiderohet si drogë e rrezikshme, për shkak të ndikimit të saj te njeriu që e konsumon dhe tek tjetri që mund të ketë ndikim”, tha Mirlinda për Radion Evropa e Lirë.

Safet Blakaj, drejtues i Qendrës rehabilituese nga droga “Labirinthi”, pohon se tashmë substanca narkotike GHB, e cila ka hyrë në treg, është shumë e përhapur dhe po përdoret nga të rinjtë, sidomos në Prishtinë.

“Tash kanë filluar të paraqiten drogat e reja që quhen ‘drogat e reja të dizajnuara’ e që komplikojnë shumë çështjen e problematikës së drogave. Sidomos në qytetin e Prishtinës ka marrë hov droga që i takon grupit të depresantëve, përdorimi i gjatë i së cilës shkakton probleme të mëdha shëndetësore”, sqaron Blakaj.

Mirlinda thotë se i është dashur shumë të konsultohet me mjekë dhe të lexojë shumë, derisa ka ardhur në përfundim se çka me të vërtetë po konsumon vëllai i saj.

“Kemi pasur problem në sjelljet e vëllait për shkak se është drogë likuide dhe drejtpërdrejt e atakon trurin. Kriza dhe varësia ishin shumë të mëdha nga kjo drogë.

Vëllai im ka rënë në mbidozë nga droga GHB, dhe e kemi dërguar në emergjencë, por nuk kanë pasur trajtim adekuat për ta trajtuar mbidozën, nuk ka pasur ndonjë trajtim emergjent për ta ndihmuar në atë rast. Por, i kanë dhënë ndihmën e parë, si frymëmarrja artificiale dhe masazh i zemrës”, tregon Mirlinda.

Ndërkaq, Shaban Mecinaj, neuropsikiatër në Qendrën Klinike Universitare, thotë se është në dijeni për këtë lloj substance, por që, siç thotë ai, është shumë e çuditshme pse askush prej përdoruesve të GHB-së nuk ka kërkuar ndihmë në Klinikën Neuropsikiatrike për trajtim nga kjo substancë!

“Te ne askush nuk kërkon ndihmë, shumë e çuditshme pse, pasi është drogë shumë e përhapur, por që nuk po kërkojnë trajtim lidhur me këtë dukuri! Është drogë shumë helmuese, sepse ka komponentë jashtëzakonisht të dëmshme toksike dhe kancerogjene, si dhe krijon varësi. Quhet edhe drogë e dhunës, sepse kur përdoret në doza të mëdha pëson ndryshime personi dhe bëhet i dhunshëm. E keqpërdorin të rinjtë edhe për rritjen e epsheve, për keqpërdorimin e gjinisë së kundërt, e kështu me radhë”, thekson Mecinaj.

Por, neuropsikiatri Mecinaj megjithatë e ka një shpjegim pse përdoruesit e kësaj substance nuk kërkojnë ndihmë mjekësore.

“Është drogë që është problem për gjykatën, hetuesinë, policinë e kështu me radhë”, shton Mecinaj.

E, autoritetet e rendit deklarojnë për REL se lidhur me substancën narkotike GHB kanë informacione se ajo është e pranishme. Sipas tyre, ende nuk ka filluar të përhapet sikur tri drogat tjera: marihuana, kokaina dhe heroina, megjithatë, ata pohojnë se kjo substancë narkotike po përdoret nga të rinjtë

Ata thonë se janë duke mbledhur informacione lidhur me mënyrën e arritjes se kësaj droge në Kosovë, si dhe mënyrën e shpërndarjes dhe përdorimit.

Edhe Safet Blakaj, këtë substancë narkotike e quan drogë e dhunimeve, meqë, siç thotë ajo edhe në Evropë njihet si e tillë.

“Është në formë të lëngët, është e pangjyrë, si uji, por më e dendur. Është shumë problematike, sepse përzihet me të gjitha pijet e mundshme dhe është problematike edhe për policinë që të ndiqet kjo drogë dhe të identifikohet”.

“Në Evropë quhet droga e dhunimeve, për arsye se doza e ulët e jep një efekt të eksitimit seksual, dhe nën ndikimin e saj kanë ndodhur dhunime të shumta dhe është shumë e vështirë edhe nga gjykatat të identifikohet se a ka qenë dhunimi nën ndikimin e kësaj lloj droge”, shpjegon Blakaj.

Ndryshe, autoritetet e rendit për periudhën 1 janar – 13 qershor të këtij viti kanë konfiskuar 49 kilogramë heroinë, 456 kilogramë marihuanë , 4 kilogramë kokainë, si dhe 1 682 bimë kanabisi./koha/kohaislame

- Advertisement -spot_img

Më tepër

Të fundit