Deklaratë Publike mbi Akuzat e Ngritura ndaj Shoqatës Ardhmëria
Veprimtarët, dashamirësit dhe mbështetësit e shoqatës Ardhmëria kanë ndjekur me shqetësim tensionin e ngritur në xhaminë e Medresesë në Tiranë, situatë e cila është shfrytëzuar pa të drejtë nga drejtuesit e KMSH-sw duke ngritur akuza të paqena ndaj shoqatës Ardhmëria.
Kërkojmë të sqarojmë opinionin publik, mediat dhe organet shtetërore se shoqata Ardhmëria mbetet e dedikuar në shërbim të jetës shpirtërore në vendin tonë. Ky dedikim dhe kjo veprimtari është tashmë më se e prekshme në shoqërinë shqiptare nëpërmjet modelit dhe kontributit të dhjetëra intelektualëve, vullnetarëve e qytetarëve që janë bërë pjesë e frymës së kësaj shoqate.
Kontributi i Ardhmërisë është njohur dhe vlerësuar publikisht vetëm pak muaj më parë nga përfaqësues të lartë të qeverisë dhe pushtetit lokal, nga vetë kryesia e KMSH-së, të cilët kanë ftuar publikisht që modeli i kësaj shoqate të jetë shembull për tu ndjekur nga veprimtarë të tjerë.
Akuzave për ekstremizëm u përgjigjemi duke bërë thirrje që të shihet ligjërimi, aktiviteti kulturor dhe produkti i dhjetë viteve të shoqatës sonë, ku duket qartë se kjo shoqatë i ka shërbyer përherë ushqimit të frymës së respektit të ndërsjellë dhe solidaritetit social, moderimit dhe dashamirësisë për të gjithë krijesat e Zotit. Ne i konsiderojmë akuza të tilla si të pabaza dhe të papërgjegjshme.
Shoqata Ardhmëria nuk është e interesuar në shkëmbime akuzash e në rritjen e tensioneve. Synimi ynë mbetet që të jemi shërbëtorë të aspektit intelektual, kulturor e moral të jetës së besimtarëve në Shqipëri.
Ne jemi të interesuar, në kuadrin e objektivave tona, që ky konflikt të marrë një zgjidhje sa më dinjitoze dhe jemi përherë të prirë që mirëkuptimi dhe kompromisi të dominojnë mbi tensionin dhe ashpërsinë.
U bëjmë thirrje dhe mbështetësve të shoqatës Ardhmëria që, me gjithë pakënaqësitë e mundshme të shkaktuara nga ngjarja në fjalë, të ruajnë respektin e duhur për institucionin tonë qendror të jetës fetare në vend, KMSH-në.
…
Rating: 3.0 of 5. 4 vote(s).