KMDLNJ ka vlerësuar se një numër i gazetarëve po prodhon tema dhe tituj mbështetur kryesisht në spekulime.
Organizata për të mbrojtjen e të drejtave të njeriut thekson se në shumë raste ato që quhen “burime të mirinformuara vendore dhe ato ndërkombëtare’, në fakt janë dezinformata që bëhen nga qarqe të ndryshme dhe grupe interesi me qëllim të përbaltjes së personave të caktuar, duke ua rrënuar integritetin moral, familjar apo rrethin e tij.
“Kjo dukuri është sidomos e rrezikshme kur kemi të bëjmë me persona të privuar nga liria, ata që dyshohen për vepra të ndryshme penale të cilët ende pa përfunduar hetimet dhe ende pa një vendim të plotfuqishëm të gjykatës përgjegjëse portretizohen si kriminelë të rrezikshëm të cilëve ‘gazetaria hulumtuese’ apo ‘eskadroni i gazetarëve të parapaguar për vrasje publike përmes linçimeve gjithashtu publike” e marrin rolin e hetuesve policorë, gjykatave, prokurorisë dhe të njësitit për ekzekutimin e vendimeve gjyqësore’”, theksohet në komunikatën e KMDLNJ-së.
“Është aktual rasti i Fatmir Limajt, i cili së bashku me të akuzuarit tjerë u lirua dhe tash përsëri gjykohet. Rasti Haradinaj gjithashtu.
Rasti Abazi ishte kurdisje tipike. Të ‘ dyshuarit’ për vrasjen e Xhemajl Mustafës ku përfoleshin emra të caktuar.
Skandali i madh dhe rasti Dino Asanaj. Arrestimi i pabazuar i mjekëve dhe si emër i njohur Tunë Pervorfi. Krejt këta dhe shumë të tjerë dolën të pafajshëm pasi u linçuan publikisht dhe iu bënë dëme thuaja të pariparueshme”, thuhet në komunikatën e KMDLNJ-së.
Sipas organizatës, opinioni kosovar u trondit me rastin e Hamdi Sopës, zyrtarit për informim të Qeverisë së Kosovës.
“Rreth këtij rasti pati dhe ka spekulime të shumta me ç’rast ende pa filluar hetimet dhe kur procesi është në fazën nismëtare po paragjykohet fajësia e anëtarëve të ngushtë të familjes, përkatësisht gruaja dhe dy vajzat e të ndjerit”, thuhet në komunikatën e KMDLNJ-së.kohaislame
