“Drita Islame”, organ i njohur i Komunitetit Musliman Shqiptar mbushi 25-vjet aktivitet. Ajo pason të famshmen “Zani i Naltë”, organ historik i këtij komuniteti deri pas lufte, që ishte ekuivalent i të famshmes tjetër, “Hylli i Dritës”, organ prestigjoz i katolikëve. “Zani Naltë” përmendet dhe në një batutë filmi, tek “Koncert në vitin ‘36”, kur hoxha, i nxehur me shakatë e theatrinave që donin të këndonin në majë të minaresë, e kërcënon prefektin se “për këto turpe që i po i ndodhnin qytetit” tonë do i shkruante dhe revistës Zani i Naltë.
Por le të kthehemi tek “Drita Islame”. Tej zakonshmërisë së një organ fetar, ajo ka të veçantat e saj në 25 vjet histori, të cilat lidhen me emrin e poetit dhe publicistit të njohur Ervin Hatibi. Pas viteve 2000, ky organ u drejtua pikërisht prej tij për pak vite; dhe ky ishte ndër raste e rralla kur një media e shkruar e destinuar për një target grup të kufizuar lexuesish, diktonte zgjerimin e rrethit të interesit për lëçitje, pikërisht për shkak të prestigjit të njeriut që e drejtonte, ardhur nga pjaca e letrave shqipe të kohës, që vijon të jetë dhe sot i tillë.
Ndërsa nga pikëpamja teknike dhe estetike, ajo pati një të veçantë unike, pasi qe e vetmja gazetë me dy apertura. Dhe kjo diktonte të kishte dy modele faqosjeje, gjë që nuk është hasur deri më sot.
Prej vitesh, “Drita Islame” ka kaluar nga gazetë në revistë, shumë më cilësore sigurisht, por pa të veçantat që i dha Hatibi…edhe në përmbajtje. /tesheshi.com/
