Ndarja e opozitës tashmë po shprehet hapur edhe ndërmjet partnerëve opozitarë. Zyrtarët e “Vetëvendosjes” e quajnë hipokrizi ftesën e AAK-së për protestë, derisa deklarojnë se nuk kanë vija të kuqe ndaj asnjë partie. Analistët thonë se pushteti i bashkoi dhe pushteti i ndau
Lufta për pushtet i bashkoi dhe është pikërisht lufta për pushtet që po i ndan tri partitë opozitare që formuan bllokun anti-Qeveri: Lëvizjen “Vetëvendosje”, Aleancën për Ardhmërinë e Kosovës dhe “Nismën për Kosovë”.
Kështu mendojnë analistët politikë, të cilët kauzën për kundërshtimin e dy marrëveshjeve, atë për Asociacionin e Komunave me Shumicë Serbe dhe për Demarkacionin me Malin e Zi, i shohin si mjet për realizimin e qëllimit, shkruan sot gazeta “Zëri”.
Opozita u përça në momentin kur në tavolinën e bisedimeve u shtruan çështjet për hyrje me një listë të përbashkët në zgjedhjet (që nuk po dihet se kur do të mbahen) kandidatin për kryeministër e prijësin e listës zgjedhore.
Akuza të ndërsjella tanimë po dalin hapur nga të dyja subjektet politike, AAK-ja dhe LVV-ja, që dëshmojnë prishjen e bllokut.
Kjo po dëshmohet dhe me faktin se AAK-ja e vetme ka vendosur të protestojë kundër Qeverisë.
Deputetja e Lëvizjes “Vetëvendosje”, Albulena Haxhiu, e ka quajtur mashtrim të qytetarëve thirrjen e protestës nga AAK-ja kundër këtij pushteti, derisa në anën tjetër deklaron se nuk ka vija të kuqe as ndaj dy partive në pushtet.
“Të ftosh protestë për dorëheqjen e regjimit autoritar dhe në anën tjetër të thuash se ‘nuk kemi vija të kuqe për asnjë parti politike’, përveçqë është hipokrizi, është edhe mashtrim për qytetarët”, ka thënë Haxhiu në një shkrim në “Facebook”.
Sipas saj, Kosova nuk ka nevojë vetëm për ndryshim fytyrash, por mbi të gjitha për ndryshim të mendësisë politike. /Zëri/
