Artistët nuk duan të performojnë në Izrael dhe shkrimtarët refuzojnë përkthimin e veprave të tyre në hebraisht
Izraeli është bërë vendi më i ekspozuar ndaj fushatave të bojkotit në mbarë botën, duke u përballur me një valë të gjerë sanksionesh ndërkombëtare që synojnë zyrtarë qeveritarë, ushtrinë dhe institucione zyrtare, raportoi të enjten gazeta e njour izraelite Yedioth Ahronoth.
Nën titullin “Si u bë Izraeli kombi më i bojkotuar në botë”, gazeta shkruan se Izraeli është përballur me një “cunami sanksionesh ndërkombëtare që synojnë zyrtarët e qeverisë izraelite, forcat okupuese dhe institucionet, duke rritur presionin nga shumë vende dhe organizata të gjata pro-BDS”.
Ajo tha se Franca së fundmi ndaloi hyrjen në vend të ministrit izraelit të Financave Bezalel Smotrich, pasi më parë kishte vendosur një ndalim të ngjashëm për ministrin e Sigurisë Kombëtare Itamar Ben-Gvir.
Sipas gazetës, ky veprim i Francës erdhi si përgjigje ndaj “promovimit aktiv të aneksimit të Bregut Perëndimor, vendbanimeve të reja dhe politikave që perceptohen si dobësim i Autoritetit Palestinez”.
Organizata e Kombeve të Bashkuara e konsideron Bregun Perëndimor, përfshirë Jerusalemin Lindor, territor palestinez të pushtuar, dhe aneksimi i tij nga Izraeli do të eliminonte mundësinë e krijimit të një shteti të pavarur palestinez, siç parashikohet në rezolutat ndërkombëtare.
Yedioth Ahronoth tha se deri më 7 tetor 2023, Izraeli kishte arritur të kufizonte ndikimin e fushatave BDS. “Sanksionet ekonomike kishin pak efekt, sepse ekonomia e fortë e Izraelit dekurajonte tërheqjen e investimeve, ndërsa bojkotet akademike dhe kulturore ishin kryesisht simbolike”- shtoi ajo.
Megjithatë, fenomeni është intensifikuar, me BDS që ka arritur sukses në fusha të ndryshme, tha gazeta. “Lëvizja e ka dëmtuar reputacionin e Izraelit ndërkombëtarisht, gjë që shihet në sondazhet e opinionit publik që tregojnë perceptime gjithnjë e më negative”- shton media izraelite.
Raporti citoi disa shembuj, përfshirë artistë që refuzojnë të performojnë në Izrael, autorë që refuzojnë përkthimin e veprave të tyre në hebraisht dhe fushata për ta përjashtuar Izraelin nga ngjarje si Eurovision apo garat e FIFA-s.
Ajo gjithashtu përmend përpjekje në rritje për të tërhequr investime të huaja, “përfshirë fondin sovran të Norvegjisë që ka tërhequr investimet nga disa kompani izraelite”.
“Lista e zezë e Këshillit të të Drejtave të Njeriut të OKB-së synon kompani izraelite dhe ndërkombëtare që operojnë përtej Vijës së Gjelbër”- thekson gazeta, duke iu referuar vendbanimeve të paligjshme në Bregun Perëndimor dhe Jerusalemin Lindor.
“Raporte dhe video nga Bregu Perëndimor që tregojnë sjellje të dhunshme dhe dëmtim prone nga forcat okupuese kanë nxitur më tej sanksionet”- thuhet në raport. “Deklaratat publike dhe veprimet e ministrave, veçanërisht videoja e Ben-Gvir që poshtëron aktivistët e flotiljes drejt Gazës, kanë shkaktuar dënime nga shumë vende si kalim i një vije të kuqe”- shton më tej artikulli.
Franca i është bashkuar Irlandës, Mbretërisë së Bashkuar, Kanadasë, Australisë, Zelandës së Re dhe Norvegjisë në kufizimin e hyrjes së ministrave izraelitë. Përveç sanksioneve, Franca ka hapur hetime për torturë dhe krime lufte të lidhura me incidentin e flotiljes, ndërsa Italia ka nisur një hetim ndaj Ben-Gvir për poshtërimin e qytetarëve italianë.
Ndërkohë BE-ja po zhvillon diskutime mbi sanksione personale ndaj ministrave izraelitë. Analistët e cituar në raport thanë se sanksionet e gjera ekonomike ndaj Izraelit “nuk ka gjasa të ndodhin në afat të shkurtër, por sanksionet personale ndaj ministrave pritet të mbeten në shqyrtim”. \tesheshi.com\
