Si Google ashtu edhe Apple u kanë dërguar një alarm përdoruesve të tyre në të gjithë botën në lidhje me një kërcënim kibernetik ndaj telefonave të tyre, pasi kompanitë konfirmuan ekzistencën e kërcënimeve, sipas një raporti të Reuters.
Apple konfirmoi për Reuters se sulmi kishte në shënjestër përdorues në më shumë se 150 vende të botës, pa dhënë detaje për numrin e përdoruesve të rrezikuar nga kjo shkelje dhe pa përmendur se kush ishte përgjegjës për të.
Google konfirmoi se softueri nga kompania izraelite Intellexa ishte përgjegjës për shkeljen, duke vënë në dukje se viktimat ishin në një numër vendesh arabe dhe aziatike, si Arabia Saudite, Egjipti, Taxhikistani dhe Pakistani.
Duhet theksuar se Intellexa i nënshtrohet një sërë sanksionesh amerikane, e megjithatë ajo e zhvillon biznesin e saj normalisht dhe pa asnjë kufizim.
Në një raport të veçantë të publikuar nga faqja e internetit e teknologjisë “The Hacker News”, një avokat i të drejtave të njeriut nga provinca pakistaneze e Blushistanit shpjegoi se kishte marrë një lidhje të dyshimtë nga një numër i panjohur në WhatsApp.
Paralajmërimi i kompanive vjen pas publikimit të një hetimi të përbashkët nga gazeta izraelite Haaretz, faqja greke e lajmeve Inside Story, faqja zvicerane e teknologjisë Inside Tech dhe Amnesty International.
Kjo nuk është hera e parë që kompanitë e telefonisë celulare u kanë dërguar një paralajmërim përdoruesve të tyre, siç ndodhi në muajt e fundit kur më shumë se 80 gazetarë u vunë në shënjestër në Itali dhe Spanjë.
Burimi: Rrjeti informativ “Al Xhazira”.
