Rusia ka humbur më shumë se 4,000 tanke që nga fillimi i luftës në Ukrainë në vitin 2022, tha gjenerali amerikan Christopher Cavoli gjatë një seance dëgjimore në Senat.

Rusia nisi një pushtim të Ukrainës në shkurt 2022, duke shpresuar për një fitore të shpejtë. Megjithatë, rezistenca e Ukrainës e ktheu konfliktin në një luftë të gjatë dhe rraskapitëse gjatë së cilës Rusia pësoi humbje të mëdha njerëzore dhe materiale.

“Rusët kanë humbur më shumë se 4000 tanke, që është pothuajse e barabartë me rezervat amerikane. Shkalla e këtij konflikti është thjesht tronditëse,” tha gjenerali Cavoli, komandant i forcave amerikane në Evropë.

Ukraina varet nga Uashingtoni

Gjenerali iu përgjigj një pyetjeje në Senat për ndikimin e pauzës së ndihmës ushtarake amerikane për Ukrainën, si dhe pezullimin e shkëmbimit të të dhënave të inteligjencës, të cilat u prezantuan nga Presidenti Donald Trump në fillim të marsit, pas një debati në një takim në Shtëpinë e Bardhë me homologun e tij ukrainas Volodymyr Zelensky.

“Natyrisht, do të kishte një ndikim të shpejtë dhe të dëmshëm në aftësinë e tyre (Ukrainës) për të luftuar”, tha gjenerali amerikan, duke shtuar se ushtria ukrainase varet nga ndihma e Uashingtonit në shkatërrimin e raketave ruse, si dhe nga inteligjenca e saj në gjetjen e posteve komanduese ruse dhe objektivave logjistike për sulm.

SHBA ka ofruar dhjetëra miliarda dollarë ndihmë ushtarake për Ukrainën që nga fillimi i luftës, por nuk ka njoftuar asnjë ndihmë të re që kur Trump mori detyrën më 20 janar. /tesheshi.com/