![Fermeri Gjylazim Ibrahimi dhe djali i tij duke kryer mbjelljet pranverore.](https://gdb.rferl.org/01000000-0a00-0242-b0bd-08dc5aebbc2d_w1597_r1_s.jpg)
Zhurma e traktorëve e thyente qetësinë e fshatit Bukosh të Vushtrrisë, mëngjesin e 11 prillit.
Fermeri Gjylazim Ibrahimi me djalin e tij po kryenin mbjelljet pranverore.
Që të dy nguteshin që të kryenin sa më shpejt punët në njërën nga arat, të cilën e mbjellin me misër që shumë vjet.
“Merrem me mbjelljen e misrit që 17 vjet”, thotë Gjylazimi.
![](https://gdb.rferl.org/01000000-0a00-0242-cff6-08dc5aed8da3_w1023_r0_s.jpg)
Këtë vit, mbjelljen po e kryejnë më herët se zakonisht për shkak të motit të mirë.
Më 11 prill, temperatura më e lartë në Kosovë u regjistrua 23 gradë celsius.
Përkundër punës së madhe që kërkon, fitimi nga kultivimi i misrit nuk është aq i lartë.
![](https://gdb.rferl.org/01000000-0aff-0242-8c9b-08dc5aeb4921_w1597_r0_s.jpg)
Viteve të fundit është vërejtur rënie e çmimit të misrit në treg.
Gjylazimi thotë se një thes misër, rreth 25 kilogramësh, aktualisht kushton 10 euro.
“Nëse vazhdon ky çmim, i cili është në treg tani, nuk ja vlen ta mbjellësh misrin”, thotë Gjylazimi.
![](https://gdb.rferl.org/01000000-0a00-0242-7642-08dc5aeb71c8_w1023_r0_s.jpg)
Më pesimist Gjylazimin e bën rritja e çmimit të farës së misrit dhe të plehrave artificiale.
Përkundër subvencioneve që fermerët marrin, Gjylazimi thotë se vlera e mbjelljes së misrit është rritur vazhdimisht.
“Në këto vitet e fundit është shumë shtrenjtë mbjellja e misrit. Çmimi i farës së misrit është nga 37 euro deri në 42, ndërsa plehu 14 euro, fara më mirë, e cila vjen nga Amerika, është 42 euro”, thotë ai.
![](https://gdb.rferl.org/01000000-0aff-0242-4b09-08dc5aeb8e81_w1597_r0_s.jpg)
Këto çmime kanë qenë më të ulëta në të kaluarën.
“Nëse e krahason me vitet e kaluara, çmimet kanë qenë më të lira. Fara [e misrit] e ka pasur çmimin 22 deri në 25 euro, ndërsa plehu artificial ka qenë 8 euro, tani është 14 euro”, thotë ai.
![](https://gdb.rferl.org/01000000-0a00-0242-915a-08dc5aeb84ee_w1023_r0_s.jpg)
Sa mbjell Kosova misër?
Sipas të dhënave të fundit zyrtare të Ministrisë së Bujqësisë, Pylltarisë dhe Zhvillimit Rural, sipërfaqja totale e mbjellur me drithëra në vitin 2022 ishte rreth 124 mijë hektarë.
Këto të dhëna tregojnë se edhe në vitin 2022 sipërfaqen më të madhe të drithërave e kanë përbërë dy kulturat kryesore, që janë gruri dhe misri.
![](https://gdb.rferl.org/01000000-0a00-0242-7677-08dc5aeba30b_w1597_r0_s.jpg)
“Gjashtëdhjetë e katër për qind apo 79.984 e sipërfaqes totale të drithërave, ishte e mbjellur me grurë dhe 32 për qind apo 39.797 hektarë ishin të mbjellura me misër. Drithërat tjera si elbi, thekra, tërshëra dhe grupi tjetër i drithërave kokërr, kishin sipërfaqe më të vogla”, thuhet në Raportin e Gjelbër 2023.
![](https://gdb.rferl.org/01000000-0a00-0242-88df-08dc5aec86d6_w1023_r0_s.jpg)
Me sasinë e prodhuar prej rreth 175 tonësh, Kosova mbulon 81 për qind të nevojave të saj. Pjesa më e madhe e misrit është përdorur si ushqim i kafshëve.
![](https://gdb.rferl.org/01000000-0a00-0242-6e7c-08dc5aeba889_w1023_r0_s.jpg)
Konsumi mesatar për kokë banori për misër, duke përfshirë edhe produktet me përmbajtje misri në vitin 2022, ishte 40 kilogramë.
![](https://gdb.rferl.org/01000000-0a00-0242-5dbf-08dc5aeb340d_w1597_r1_s.jpg)
Sipas Ministrisë së Bujqësisë, Pylltarisë dhe Zhvillimit Rural në Kosovë, vlera e subvencioneve për pleh ishte 150 euro për hektarë për grurë, dhe 100 euro për hektarë për misër, patate dhe fasule monokulturë.