–Zyrtarët e Iranit thonë se së paku 131 iranianë janë në mesin e 717 pelegrinëve, që dje kanë humbur jetën në rrëmujë gjatë haxhillëkut në Arabinë Saudite.
Kjo ishte tragjedia më e madhe në këtë ngjarje vjetore myslimane, prej vitit 1990.
Said Ohadi, shef i Organizatës iraniane të haxhillëkut, tha se ishin plagosur edhe 60 iranianë të tjerë.
Zyrtarët e Arabisë Saudite thanë se së paku 717 vetë kanë humbur jetën dhe 805 të tjerë janë plagosur, gjatë rrëmujës në vendin e ritualit të fundit të haxhillëku, kur qindra mijëra njerëz në mënyrë simbolike e kryejnë gjuajtjen e gurëve kundër djallit.
Vlerësohet se më se 2 milionë myslimanë nga 164 vende, gjenden në Arabinë Saudite për haxhillëk, që ka filluar më 22 shtator.
