“Ka pasur një rënie të shpejtë në sasinë e dërgesës së ndihmave në Rripin e Gazës”, tha Stephane Dujarric, zëdhënës i Sekretarit të Përgjithshëm të OKB-së
Organizata e Kombeve të Bashkuara (OKB) vuri në dukje sot situatën e rëndë humanitare në Rripin e Gazës, duke thënë se asnjë nga kolonat e saj të ndihmave humanitare nuk ka arritur në veri të Gazës që nga 23 janari, raporton Anadolu.
Kolegët nga agjencia e OKB-së për refugjatët palestinezë (UNRWA) “na kujtojnë se asnjë nga kolonat tona humanitare nuk ka mundur të arrijë në pjesën veriore të Rripit të Gazës që nga 23 janari. Siç e dëgjuat dje nga komisari i përgjithshëm (Philippe Lazzarini), ka pasur një rënie të shpejtë në sasinë e dërgesës së ndihmave në Rripin e Gazës”, tha në një konferencë shtypi Stephane Dujarric, zëdhënës i Sekretarit të Përgjithshëm të OKB-së Antonio Guterres.
Duke theksuar nevojën për më shumë pika hyrjeje dhe rrugë të sigurta në Gaza, Dujarric tha se UNRWA-ja ka furnizime ushqimore në kufirin me Gazën për të furnizuar deri në 2,2 milionë njerëz në gjithë Rripin e Gazës.
“Pothuajse 1.000 kamionë që transportojnë 15.000 tonë metrikë ushqime janë në Egjipt gati për të lëvizur”, shtoi ai.
Izraeli nisi një ofensivë vdekjeprurëse në Rripin e Gazës pas një sulmi të Hamasit më 7 tetor, duke vrarë afro 30.000 njerëz dhe duke shkaktuar shkatërrim masiv dhe mungesë të gjërave të nevojshme.
Rreth 1.200 izraelitë besohet të jenë vrarë në operacionin e Hamasit.
Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
