Sekretari i Përgjithshëm i NATO-s, Jens Stoltenberg, i cili gjatë kësaj ishte për vizitë në disa vende të Ballkanit Perëndimor ka folur sot për situatën e sigurisë në Kosovë, Bosnjë dhe Hercegovinë dhe në përgjithësi në rajon.
Stoltenberg në një konferencë të përbashkët për shtyp, pas takimit me liderët e Shqipërisë, Maqedonisë së Veriut, Kroacisë dhe Malit të Zi, Stoltenberg tha se ka ardhur koha të zgjidhen përfundimisht konfliktet në Ballkan dhe se sipas tij ky rajon është me rëndësi strategjike për NATO-n.
Ai para mediave duke folur për situatën e sigurisë në Kosovë tha se nuk sheh rreziqe të drejtpërdrejta ushtarake ndaj ndonjë vendi aleat të NATO-s në rajon, raporton Telegrafi.
“Nuk shohim rreziqe të drejtpërdrejta ushtarake ndaj ndonjë vend aleat të NATO-s në këtë regjion. Çka shohim është rritje e tensioneve veçanërisht në Kosovë dhe po ashtu në Bosnjë, por nuk shohim ndonjë kërcënim direkt ushtarak”, tha ai.
Stoltenberg më tej tha se në Kosovë tashmë kanë rritur prezencën e ushtarëve, janë vigjilent dhe e monitorojnë për së afërmi situatën.
“Jemi aleatë të rajonit do të shqyrtojmë propozimin e kryeministrit Edi Rama, i mbështetur edhe nga presidenti kroat që të takohemi në bazë më të rregullt….”, tha kreu i NATO-s.
Ai ka folur edhe për dialogun Kosovë-Serbi, situatën fragjile në Kosovë, etj.
“Në çdo vend që vizitova theksova se stabiliteti në Ballkan varet nga të gjitha palët, duke zgjedhur dialogun dhe diplomacinë para konfliktit dhe kaosit”, tha ai.
Shefi i NATO-s po ashtu ka folur edhe për luftën hibride të Rusisë në rajon. /Telegrafi/
