Teherani i “bëhet vëlla” Moskës në ditë të vështira
Teherani po merr pjesë në luftën midis Rusisë dhe Ukrainës duke dërguar “qindra dronë” disa prej të cilëve do të jenë të armatosur, tha Këshilltari i Sigurisë Kombëtare i SHBA-së, Jake Sullivan.
Gjatë një konference në Shtëpinë e Bardhë, ai përcolli informacionin e furnizimit të materialit “me procedura urgjente”. Në të njëjtën kohë do të fillojë edhe trajnimi i personelit nga operatorët iranianë.
Megjithatë, nuk është e qartë nëse mjetet e para tashmë janë dorëzuar, tha konsulenti.
Gjatë luftës u duk se Rusia ka humbur një numër të madh të dronëve që nuk mund t’i zëvendësojë lehtësisht. Irani madje mund të ketë më shumë përvojë me dronët e armatosur ose dronët kamikaze sesa Rusia. Blerja nga Irani, thotë një ekspert amerikan për Politico, është një lëvizje dëshpërimi nga ana e Moskës, e cila ka pak burime të pajisjeve ushtarake për shkak të embargos me të cilën përballet.
Dronët kanë luajtur një rol të rëndësishëm që nga fillimi i pushtimit rus të Ukrainës më 24 shkurt; ato përdoren për mbledhjen e inteligjencës, zbulimin dhe vëzhgimin, për lëshimin e raketave, hedhjen e bombave…
SHBA njoftoi javën e kaluar një paketë të re ndihme ushtarake prej 400 milionë dollarësh për Ukrainën, duke përfshirë sisteme të shumta lëshimi HIMARS dhe municione të drejtuara me saktësi. Që nga fillimi i pushtimit ushtarak rus, Uashingtoni ka dërguar 6.9 miliardë dollarë ndihmë ushtarake për Ukrainën. /tesheshi.com/
