Ministria e Mbrojtjes e Armenisë tha se nga një shkëmbim zjarri në kufirin me Azerbajxhanin ka mbetur i vdekur një oficer ushtarak armen.
Tensionet mes dy vendeve mbesin të larta pas luftës së vitit të kaluar për rajonin e shkëputur të Nagorno Karabakut.
Autoritetet armene pretendojnë se ishin forcat azerbajxhanase që “provokuan” pasi provuan të bëjnë përparime në pozicionet e tyre brenda territorit armen.
Ministria armene në njoftimin e saj tha gjithashtu se një ditë më parë dyshohet se njësitë azerbajxhanese u përpoqen të hyjnë në territorin armen dhe nga përleshjet mbeti i vrarë një ushtar i Azerbajxhanit.
Në një deklaratë të veçantë, ministria e Mbrojtjes e Azerbajxhanit pretendoi se forcat armene gjithashtu hapën zjarr mbi pozicionet në qarkun Kalbacar dhe qytetin e Suzës.
Më shumë se 6 mijë persona u vranë gjatë luftimeve të vitit të kaluar mes Armenisë dhe Azerbajxhanit për rajonin e Nagorno Karabakut.
Rajoni njihet ndërkombëtarisht si pjesë e Azerbajxhanit, por që ishte kontrolluar nga armenët etnikë që në fillim të viteve 1990.
Luftimet përfunduan në bazë të një marrëveshjeje të ndërmjetësuar nga Moska, e cila i mundësoi Azerbajxhanit të kthejë në administrim një pjesë të Nagorno Karabakut.
Rreth 2 mijë paqëruajtës rusë u vendosën në rajon.
