Përfaqësuesit e mësimdhënësve po insistojnë që të kompensohen mësimdhënësit, të cilët do të angazhohen në mësimin plotësues. Me këtë kërkesë pajtohet edhe drejtori i shkollës fillore “Pavarësia” në Prishtinë, Shefki Rusinovci dhe arsimtarja e matematikës po në këtë shkollë, Minivere Tahiri.
Ministria e Arsimit, Shkencës, Teknologjisë dhe Inovacionit (MASHTI) ka marrë vendim për mbajtjen e mësimit plotësues për nxënësit e arsimit fillor dhe atij të mesëm në Kosovë, për orët e humbura si pasojë e pandemisë së koronavirusit.
Rrahman Jasharaj, kryetar i Sindikatës së Bashkuar për Arsim, Shkencë dhe Kulturë, duke e vlerësuar të nevojshëm realizimin e mësimit plotësues për shkak të ndikimit të pandemisë në mbarëvajtjen e procesit mësimor, thotë se mësimdhënësit nuk janë fajtorë për orët e humbura të mësimit.
“Besoj që do arrijmë një marrëveshje të mirëkuptimit me drejtoritë komunale të arsimit dhe Ministrinë e Arsimit, që këta mësimdhënës, për orët shtesë të kenë një kompensim sepse ata edhe ashtu janë të lodhur, të ngarkuar dhe të stresuar nga pesha e stresit të COVID-19. Madje, edhe pas shumë kërkesave dhe apeleve të SBASHK-ut, ende nuk është arritur të sigurohet sasi e duhur e vaksinave kundër COVID-19 për punonjësit e sistemit të arsimit”, thotë Jasharaj për Radion Evropa e Lirë.
