Imami i xhamisë së Shipolit në Mitrovicë, Fatmir Latifi ka rrëfyer gjëra interesante në emisionin “Personale” në RTV Dukagjini.
Latifi i është bashkuar Ushtrisë Çlirimtare të Kosovës (UÇK) në moshën 18 vjeçare, ndërsa si pasojë e luftës ai ka mbetur invalid , duke humbur njërën dorë.
Është karakteristike se imami nga Mitrovica, Fatmir Latifi njërin nga tre fëmijët e tij e ka pagëzuar me emrin Adem Jashari.
“Kam shërbye në Prekaz dhe aktivitetin tim e kam pasur kryesisht në Zonën e Drenicës…Mora përgjegjësi bashkë me disa shokë për të kryer një detyrë ushtarake në pjesën e Junikut, biem në pritë pasi na humbi rruga. Unë humba shuplakën e dorës, por kamë humbë rreth dy litra gjak dhe kam qenë i pandjenja. Por fatmirësisht kaluam kufirin më Shqipërinë dhe e shoh vetën në Spitalin Ushtarak”.
Latifi tregon se për shkak se gjendja ishte e rëndë ai ishte dërguar për kurim më Turqi.
“Mjekët më kanë treguar se lëndimi ishte i rëndë dhe kisha humbur një pjesë të madhe të dorës, buzën e poshtme dhe gjëndrat pështymore”.
Imami tregon se nga aty ndryshoi edhe rrjedha e jetës së tij pasi i erdhi një ftesë nga Medina për të vijuar studimet në Universitetin Islamik të Medinës.
Latifi ka thënë se ka të dhëna se ka mbi 100 hoxhallarë nga Kosova i janë bashkangjitur radhëve të UÇK-së.
“Janë mbi 100 hoxhallarë që i janë bashkuar luftës së UÇK-së. Ka hoxhallarë që kanë qenë edhe të burgosur politikë, siç është hoxha Ekram Avdiu”.
Punëtori i Bashkësisë Islame ka treguar se përpos punës së imamit që ushtron në xhaminë e Shipolit në Mitrovicë, ai bën edhe pajtimin e gjaqeve, mes familjeve të hasmuara.
“…Madje kemi bërë edhe pajtimin e çifteve bashkëshortore”, -thotë hoxha duke shtuar se ”ky nuk është profesion por punë vullnetare dhe bëhet pa pagesë”.
Imami tregon shifra të frikshme sa u përket vrasjeve ndërmjet shqiptarëve.
“Me keqardhje them se nga periudha e pasluftës e deri sot, janë të evidentuara rreth 1,500 vëllavrasje në Kosovë. Është shifër alarmante por fatmirësisht kohëve të fundit ka një rënie”, tha ndër të tjera Fatmir Latifi.
https://www.facebook.com/telegraficom/videos/2181589948572477/
