Arabia Saudite mohoi sot akuzat e senatorëve amerikanë, mbi përfshirjen e princit të Kurorës Mohammed bin Salman në vrasjen e gazetarit saudit, Jamal Khashoggi, raporton Anadolu Agency (AA).
“Në asnjë moment princi i Kurorës nuk ka qenë në lidhje me ndonjë zyrtar saudit ose me ndonjë njësi qeveritare për të dëmtuar Jamal Khashoggin”, shkroi në Twitter, Fatima Baeshen, zëdhënëse e ambasadës saudite në Washington.
“Hedhim poshtë kategorikisht të gjitha akuzat të cilat pretendojnë një lidhje të princit me këtë incident të tmerrshëm”, tha ajo.
Baeshen thotë se autoritetet e vendit mbesin në deklaratat e para se princi i Kurorës komunikon rregullisht me zyrtarët e gjykatës Mbretërore.
Një raport i CIA-s, i lëshuar në nëntor, implikon bin Salman në vrasjen e Khashoggit.
“Mbretëria e Arabisë Saudite ka qenë transparente në adresimin e këtij gabimi tragjik, duke kërkuar përgjegjësi për fajtorët, me çka ka vendosur masa korrektuese për të siguruar se nuk do të përsëritet një boshllëk i tillë institucional i kësaj natyre katastrofike”, shkroi Baeshen.
Në një konferencë për media sot, pas një brifingu me drejtoren e CIA-s, Gina Haspel, senatorja amerikane Lindsey Graham e përshkroi princin saudit të Kurorës “një gjyle shkatërruese”.
“Mendoj se ai është bashkëpunëtor në vrasjen e Khashoggit, në nivelin më të lartë të mundshëm”, tha Graham.
Senatori Bob Corker, një nga tetë senatorët e pranishëm në konferencë, u tha gazetarëve se beson se bin Salman është përgjegjës për vrasjen.
