Futbollisti gjerman, Lukas Podolski dhe romancieri i shquar brazilian, Paulo Coelho, kanë publikuar mesazhe në mbështetje të futbollistit me origjinë turke, Mesut Ozil, i cili njoftoi tërheqjen nga kombëtarja e Gjermanisë për shkak të sulmeve raciste…
Sulmuesi gjerman, Lukas Podolski, ka postuar në median sociale një mesazh në mbështetje të futbollistit me origjinë turke, Mesut Ozil, i cili njoftoi tërheqjen nga kombëtarja e Gjermanisë për shkak të sulmeve diskriminuese.
Podolski, shok skuadre i Ozilit në kombëtaren gjermane të futbollit dhe gjithashtu për 2 vite tek Arsenali, ka publikuar në “Istagram” një fotografi të tyre duke festuar triumfin në Kupën e Botës – FIFA 2014, të cilën e shoqëron me një dedikim.
“Një turne dhe natë historike, të cilat nuk do t’i harrojmë kurrë. Kampionë Botërorë përgjithmonë! Ne kemi fituar shumë herë së bashku dhe nganjëherë jo, ky është futbolli; por ishte gjithmonë magjike të kishe ty si shok skuadre në klub dhe kombëtare. Ne kemi ndarë shumë çaste të këndshme e kemi qeshur së bashku dhe jam i sigurt ta bëjmë përsëri. Gjithmonë qofsh i lumtur dhe ruaj shpirtin tënd pozitiv”, shkruan Podolski.
Mbështetje për Mesut Ozilin ka shprehur edhe romancieri brazilian me famë botërore, Paulo Coelho.
“Vlen të lexohet: ‘Unë jam një imigrant kur humbim.’ Pavarësisht se çfarë thonë ata, ti ke qenë, je dhe do të jesh gjithnjë një fitues, Ozil”, shkruan Coelho nga llogaria e tij zyrtare në rrjetin social, “Twitter”, duke iu referuar letrës përmes së cilës futbollisti gjerman me origjinë turke njoftoi tërheqjen nga “Die Mannschaft”.
Në maj të këtij viti, futbollistët me orgjinë turke të kombëtares gjermane, Mesut Ozil dhe Ilkay Gundogan, si dhe sulmuesi turk, Cenk Tosun, të cilët luajnë në Premierligën angleze, u takuan në Londër me Presidentin Recep Tayyip Erdogan dhe u fotografuan duke i dhuruar atij nga një fanellë të klubeve përkatëse. Pas këtyre fotografive, në Gjermani shpërtheu një lumë kritikash dhe sulmesh raciste, të cilat gati sa nuk u kthyen në fushatë linçimi, kundër Mesut Ozilit dhe Ilkay Gundoganit.
Worth reading : I am an immigrant when we lose
Regardless what they say you were, is, and will always be a winner, Özil https://t.co/FnaWjAogMi— Paulo Coelho . (@paulocoelho) 23 Temmuz 2018
