KOPENHAGË (AA) – Një hulumtim i zhvilluar në Danimarkë tregon se numri i xhamive në këtë shtet është rritur nga 115 në 170, raporton Anadolu Agency (AA).
Prof. Dr. Lene Kühle nga Universiteti Arhus së bashku me asistentin e saj Malik Larsen ka zhvilluar një hulumtim lidhur me numrin e xhamive në vend.
Sipas këtij hulumtimi numri i xhamive në Danimarkë nga 115 sa ishte deri në vitin 2006 është rritur në 170 për dhjetë vite.
Ky hulumtim u zhvillua pas kërkesës së Partisë Liberale Venstre, Partisë Social-Demokrate dhe partive të së djatthtës ekstreme Partia Popullore e Danimarkës dhe Partia Popullore Konservatore, për përditësim të hulumtimit të vitit 2006.
Më tej thuhet se kjo rritje e numrit të xhamive ka ndodhur për shkak të rritjes së popullsisë muslimane në shtet.
Sipas ligjeve, në Danimarkë nuk bëhet regjistrimi i popullsisë sipas përkatësisë fetare, por parashikohet se 7 për qind e popullsisë së Danimarkës, e cila përbëhet nga 5.7 milionë banorë i takon fesë muslimane.
29 prej tyre i përkasin Fondacionit Turk të Çështjeve Fetare
Gjithashtu bëhet e ditur se 29 nga 170 xhami në Danimarkë janë në kuadër të Fondacionit Turk të Çështjeve Fetare në Danimarkë ndërsa financimi i këtyre xhamive bëhet nga anëtarët e shoqatës.
Në Danimarkë zakonisht ndërtesat e fabrikave të vjetra po shndërrohen dhe përdoren si xhami. Kurse xhamia e parë turke, e cila është ndërtuar që nga themeli është xhamia “Hedehusene Fetih”, e cila ishte hapur për ibadet në vitin 2014.
Kurse këtë vit ishte bërë hapja e xhamisë Ulu në qytetin Arhus e cila është ndërtuar nga zero.
Ndërkaq, tani është arritur edhe deri në përfundim të ndërtimit të xhamisë së tretë turke, xhamia Roskilde Ajasofja, e cila është ndërtuar nga themeli. Kjo xhami pritet të hapet pas vitit të ri.
Xhamitë me financime nga shtetet e jashtme shkaktojnë reagime në vend
Financimi i xhamisë së parë me një minare nga Katari, qendra e civilizimit Hamad Bin Khalifa, e cila u hap në vitin 2014 në kryeqytetin e Danimarkës, Kopenhagë, shkaktoi reagime të shumta në këtë vend.
Poashtu edhe financimi për një pjesë të një xhamie tjetër të quajtur Imam Ali nga Irani, e cila u hap në Kopenhagë në vitin 2015, shkaktoi reagime në opinionin publik të këtij shteti.
