Mesazhi përpara një takimi: “Zelensky mund ta përfundojë luftën menjëherë”
Presidenti i SHBA-së Donald Trump tha se presidenti ukrainas Volodymyr Zelensky “mund ta përfundojë luftën me Rusinë nëse dëshiron”, por gjithashtu theksoi se “Ukraina nuk do t’i bashkohet NATO-s” si pjesë e një marrëveshjeje të ardhshme paqeje.
Disa orë para takimit me Zelensky-n në Shtëpinë e Bardhë, presidenti i SHBA-së deklaroi gjithashtu se nuk kishte “kthim” në gadishullin e Krimesë, të cilin Moska e aneksoi në mënyrë të paligjshme në vitin 2014, tetë vjet para fillimit të pushtimit në shkallë të plotë të Ukrainës.
Këto deklarata pasuan takimin e Trump me presidentin rus Vladimir Putin në Alaska. Pas samitit, Trump u tërhoq nga këmbëngulja e tij e mëparshme për një armëpushim dhe në vend të kësaj bëri thirrje për një marrëveshje të përhershme paqeje.
Me të mbërritur në Shtetet e Bashkuara të dielën në mbrëmje, Zelensky bëri përsëri thirrje për garanci të forta sigurie nga aleatët perëndimorë. Në të njëjtën kohë, i dërguari i SHBA-së tha se Putin ishte gati të merrte në konsideratë një zgjidhje të mundshme sigurie për Ukrainën, të ngjashme me modelin e NATO-s, megjithëse udhëheqësi rus gjithmonë e ka hedhur poshtë vetë idenë e anëtarësimit të Ukrainës në aleancën ushtarake.
Trump përsëriti qëndrimin e tij në platformën e tij Truth Social:
“Presidenti ukrainas Zelensky mund ta përfundojë luftën me Rusinë pothuajse menjëherë, nëse dëshiron, ose mund ta vazhdojë luftën. Mos harroni se si filloi. Nuk ka kthim të Krimesë që dha Obama (12 vjet më parë, pa asnjë të shtënë!), dhe asnjë hyrje në NATO nga Ukraina. Disa gjëra nuk ndryshojnë kurrë”, shkroi ai.
Kujtojmë se para rikthimit të Trump-it në pushtet në janar, anëtarët e NATO-s ranë dakord se rruga e Kievit drejt anëtarësimit ishte “e pakthyeshme”. Zelensky do ta diskutojë pikërisht këtë temë me udhëheqësit e vendeve evropiane në Uashington. Përveç Sekretarit të Përgjithshëm të NATO-s Mark Rutte, në takim do të marrin pjesë edhe kryeministri britanik Sir Keir Starmer, presidenti francez Emmanuel Macron, kryeministrja italiane Giorgia Meloni, kancelari gjerman Friedrich Merz, presidenti finlandez Alexander Stubb dhe presidentja e Komisionit Evropian Ursula von der Leyen.
Trump tha me rastin e mbledhjes së udhëheqësve evropianë:
“Ditë e madhe në Shtëpinë e Bardhë nesër. Nuk kam pasur kurrë kaq shumë udhëheqës evropianë në të njëjtën kohë. Është një nder i madh t’i pres ata.”
Zelensky falënderoi për ftesën në rrjetet sociale:
“Ne të gjithë ndajmë një dëshirë të fortë për ta përfunduar këtë luftë shpejt dhe me besueshmëri,” theksoi ai. /tesheshi.com/
