Deklarata e fundit e presidentit amerikan Donald Trump, i cili në një bisedë telefonike me kryeministrin izraelit Benjamin Netanyahu tha se “të gjithë e urrejnë Izraelin”, u duk si një provokim tipik i tij.
Por përtej stilit të drejtpërdrejtë, shifrat e reja ndërkombëtare sugjerojnë se ai mund të ketë prekur një realitet të pakëndshëm për Tel Avivin: opinioni publik global po kthehet gjithnjë e më shumë kundër Izraelit.
Sipas një sondazhi të fundit të Pew Research Center në 36 vende, një mesatare prej 67 për qind e të rriturve kanë një opinion të pafavorshëm për Izraelin, ndërsa vetëm 25 për qind shprehen pozitivisht.
Në vetëm një vend – Kenia – perceptimi pozitiv arrin në 50 për qind. Në vende si Turqia dhe Pakistani, nivelet e opinionit negativ arrijnë respektivisht në 97 dhe 95 për qind. Dhe tendenca është në përkeqësim.
Në 13 nga 24 vendet ku ekzistojnë të dhëna krahasuese, qëndrimet negative janë rritur ndjeshëm krahasuar me vitin e kaluar. Edhe në shtete me qeveri të hapura pro-izraelite, si Argjentina nën presidentin Javier Milei, shumica e popullsisë tashmë mban qëndrim negativ.
Në Evropë, hendeku mes elitave politike dhe opinionit publik duket i thellë. Në Gjermani, 73 për qind e qytetarëve e shohin Izraelin në mënyrë të pafavorshme, një rritje e ndjeshme nga viti i kaluar.
Situata është e ngjashme paraqiten në Suedi, Spanjë, Holandë dhe Itali, ku treçereku i popullsisë shprehin qëndrime negative. Kjo sugjeron se mbështetja e fortë zyrtare ndaj Izraelit në shumë kryeqytete evropiane nuk pasqyron domosdoshmërisht ndjenjat e elektoratit.
Një dimension tjetër i rëndësishëm është përçarja ideologjike. Në Shtetet e Bashkuara, diferenca mes së majtës dhe së djathtës mbetet e theksuar: 83 për qind e votuesve të majtë kanë opinion negativ për Izraelin, kundrejt 37 për qind në të djathtë.
Megjithatë, edhe brenda kampit konservator, mbështetja nuk është më unanime. Për më tepër, hendeku brezash është i dukshëm në Amerikë dhe Evropë: të rinjtë janë dukshëm më kritikë sesa gjeneratat e vjetra.
Një sondazh i veçantë i Pew Research Center në SHBA tregon se 60 për qind e amerikanëve kanë tani qëndrim negativ ndaj Izraelit – një rritje e fortë krahasuar me vitet e fundit. Mes moshës 18-49 vjeç, shumica në të dy partitë – demokrate dhe republikane – shprehen negativisht për të.
Ky ndryshim ka shkaktuar alarm në lobin pro-izraelit në Uashington. AIPAC ka shpenzuar shuma rekord për të rrëzuar politikanë kritikë ndaj ndihmës ushtarake për Izraelin, si kongresmeni republikan Thomas Massie.
Megjithatë, fitorja e politikanëve kritikë si Zohran Mamdani në skena të rëndësishme lokale sinjalizon se ndikimi financiar mund të mos mjaftojë për të përmbysur trendin afatgjatë.
Përballë këtij realiteti, disa figura të lobit, si miliarderi Ron Lauder, president i World Jewish Congress, kanë propozuar një ofensivë të re propagandistike me buxhete miliardëshe për të përmirësuar imazhin e Izraelit.
Buxheti i vitit 2026 i Izraelit parashikon rreth 730 milionë dollarë për “hasbara” – diplomacinë publike ose më shumë se katërfishi i vitit të kaluar. Megjithatë, edhe media izraelite si The Jerusalem Post ka cituar ekspertë që shprehen skeptikë.
Asnjë fushatë marketingu nuk mund të zhbëjë perceptimet e krijuara nga luftërat dhe viktimat civile në Gaza dhe rajon.
Në këtë kontekst, deklarata e Trump tingëllon më pak si hiperbolë politike dhe më shumë si një përmbledhje brutale e një prirjeje globale. Pyetja thelbësore nuk është më nëse opinioni publik po largohet nga Izraeli, por nëse politika perëndimore do të vazhdojë të ecë në drejtim të kundërt me votuesit e saj. \tesheshi.com\
