Shkruar nga: Rami Abu Zubeida
Në mëngjesin e sotëm, zëdhënësi i ushtrisë izraelite njoftoi se ushtria izraelite ka përfunduar ndërtimin e boshtit “Muraj”, i cili ndan mes qyteteve Khan Younis dhe Rafah. Boshti Muraj konsiderohet një pikë strategjike për shkak të vendndodhjes së tij gjeografike pranë kufirit me Egjiptin, dhe përbën një arterie jetike dhe një nyje lidhëse midis Rafah dhe Khan Younis, duke i dhënë (Izraelit) aftësi më të mëdha për të monitoruar lëvizjet dhe për të minuar përpjekjet dhe përgatitjet e rezistencës.
Boshti ndodhet në një zonë të lartë gjeografike, gjë që i jep forcave pushtuese aftësi për të vëzhguar të gjitha lëvizjet në qarkun e Rafah dhe Khan Younis. Gjithashtu, zona përreth konsiderohet si shporta kryesore ushqimore e jugut të Rripit të Gazës dhe përmban shumicën e puseve të ujit të nëndheshëm, gjë që e bën atë me rëndësi të madhe për banorët e Gazës.
Pushtimi, si pjesë e një strategjie më të gjerë, po përpiqet të riformësojë realitetin e sigurisë dhe politikës në Gaza dhe të rindërtojë gjeografinë demografike dhe politike.
Cilat janë pasojat ushtarake të këtij boshti?
1. Izolimi i plotë i Rafah nga Khan Younis, duke thyer lidhjet gjeografike mes pjesëve të Rripit të Gazës dhe duke i ndarë ato, përmes ngritjes së boshtit të përhershëm ushtarak dhe të sigurisë izraelite. Kjo pengon lëvizjen e palestinezëve, dobëson lidhjet gjeografike dhe shoqërore dhe kufizon ndikimin dhe aftësitë e rezistencës.
2. Forcimi i sigurisë izraelite: Sipas vizionit izraelit, boshti është pjesë e një strategjie të gjerë për të parandaluar çdo kërcënim të mundshëm përmes kontrollit mbi zonat jetike.
3. Ky bosht do t’i japë ushtrisë izraelite mundësinë për të vendosur një rrethim të fortë mbi Rafah dhe Khan Younis, duke i mundësuar manovrim të shpejtë mes mbrojtjes dhe sulmit brenda pak minutash.
4. Ndryshimi i baraspeshës së sigurisë dhe ushtarake, përmes kufizimit të lëvizjeve të rezistencës dhe zvogëlimit të aftësisë për të futur armë apo furnizime përmes kufirit.
5. Dobësimi i rezistencës, përmes shkatërrimit të infrastrukturës së saj në zonat përreth.
Deri më tani, lëvizjet izraelite janë të nxitura nga motive partiake dhe personale, dhe duket se janë më të përqendruara te kontrolli i drejtpërdrejtë ushtarak dhe në minimin e çdo forme rezistence palestineze, duke anashkaluar çdo përpjekje reale për një armëpushim gjithëpërfshirës që do t’i jepte fund agresionit.
Ku është rezistenca?
Ka shumë të ngjarë që forcat izraelite të përballen me një përshkallëzim ushtarak nga fraksionet e rezistencës palestineze, të cilat nuk do të lejojnë vendosjen e një realiteti të ri pa reagim. Rezistenca palestineze do të trajtojë këtë bosht njësoj siç ka vepruar më parë me boshtet “Filadelfia”, “Netsarim” dhe “Meflasim”, duke mos e pranuar këtë realitet të ri.
Ditët do ta tregojnë se sa i vendosur është pushtimi për të mbajtur boshtin Muraj, aq e madhe do të jetë edhe këmbëngulja dhe sfida e rezistencës për të ndjekur objektivat e saj. Ashtu siç u tërhoq pushtimi nga Muraj në vitin 2005, do të thyhet sërish, dhe as mbrojtjet, as muret dhe as radarët nuk do ta mbrojnë atë, dhe ky bosht nuk do të jetë pengesë për operacionet e rezistencës. Kjo rezistencë nuk njeh dorëzim; ajo do të përballojë çdo vështirësi për të arritur në zemër të qendrave të armikut dhe për t’i shkaktuar atij humbje.
