Një lexim mbi artikullin e Ben Dror-Yemini në gazetën Yedioth Ahronoth
Gazetari izraelit Ben Dror ka botuar së fundmi një artikull të ashpër në Yedioth Ahronoth, ku përshkruan me tone kritike gjendjen e brendshme të Izraelit përballë një lufte të vazhdueshme dhe pa horizonte politike. Sipas tij, vendi është duke përjetuar një shpërbërje të diskursit politik dhe të strukturave shtetërore, përballë një logjike të vetme: vazhdimit të luftës.
Pushteti i përqendruar dhe heshtja e brendshme
Ben Drori nënvizon se protestat janë shuar, zërat opozitarë janë heshtur dhe këshilltarët politikë janë tërhequr. Vendimmarrja politike është përqendruar tek një njeri i vetëm — Benjamin Netanyahu — ndërsa qeveria, sipas tij, është reduktuar në një dekor të pafuqishëm.
Luftë për mbijetesë politike
Artikulli e paraqet Netanyahun si të vetmin këmbëngulës për vazhdimin e luftës në Gaza. Jo sepse shoqëria izraelite e kërkon, por sepse ky është instrumenti i tij për të ruajtur pushtetin. Kostoja për shtetin, thotë Yemini, është dytësore përballë interesit personal të udhëheqësit.
Pa objektiva, pa fitore
Pas vite të tëra përleshjesh, rënies së qindra ushtarëve dhe dobësimit të pjesërishëm të Hamasit, Izraeli nuk ka arritur një fitore të qartë. Çdo sukses ushtarak ka një kosto më të madhe se përfitimi, dhe asnjë objektiv strategjik nuk është materializuar.
Dështimi diplomatik dhe izolimi ndërkombëtar
Autori kujton se refuzimi i Tel Avivit për të pranuar nisma si plani egjiptian apo dokumentet e përbashkëta arabe ka thelluar izolimin e tij ndërkombëtar. Madje, disa vende që ruanin paqe me Izraelin kanë filluar të afrohen me kundërshtarët e tij.
Retorikë boshe dhe “Sparta” si paralajmërim
Ben Drori ironizon retorikën e Netanyahut, që i paraqet operacionet e largëta si “mesazhe” strategjike, ndërsa realiteti tregon dobësim politik dhe strategjik. Ai përdor edhe metaforën e Spartës, një shoqëri që u ngrit mbi dhunën dhe luftën e përhershme, por që përfundoi në rrëzim. Paralajmërimi është i qartë: rruga “Spartane” mund të çojë Izraelin drejt një fundi të ngjashëm.
Pasojat që paralajmëron autori
•Lufta është shndërruar nga mjet i sigurisë kombëtare në instrument të mbijetesës politike.
•Kostoja e gjakut, parasë dhe përçarjeve do të thellojë izolimin ndërkombëtar dhe krizën e brendshme.
•Mungesa e një plani për administrimin e Gazës pas luftës lë boshllëqe strategjike të rrezikshme.
•Sukseset ushtarake të pjesshme nuk arrijnë të mbulojnë dështimin strategjik.
•Hamasi, duke e zvarritur luftën në një moçal afatgjatë, arrin të shterojë politikisht dhe moralisht Izraelin.
Përfundimi
Ben Dror- Yemini vizaton një tablo të zymtë të shtetit dhe udhëheqjes së tij: një qeverisje e përqendruar tek një individ, e cila zgjedh rrugën e luftës së pafundme, pa alternativa politike dhe pa vizion për të ardhmen. Paralajmërimi i tij është i prerë: vazhdimi i kësaj rruge mund ta çojë Izraelin drejt një kolapsi më të madh se sa mendohet.
Rami Ebu Zubejde
Analist i çështjeve të sigurisë
