Dita më madhështore tek Allahu ﷻ
Dita e “Jeumul-Karr” është dita e 11-të e Dhul-Hixhes.
Pejgamberi ﷺ ka thënë:
“Me të vërtetë, ditët më madhështore tek Allahu i Lartësuar janë dita e Kurbanit, pastaj dita e ‘Karr-it’.”
Sahih el-Xhami 1064
Imam Albani رحمه الله ka thënë:
Dita e “Karr-it” është dita pas Kurban Bajramit, pra 11 Dhul-Hixhe, sepse njerëzit qëndrojnë në Mina, pushojnë dhe vendosen aty pasi kanë përfunduar tavafin e ifadas dhe therjen e kurbanit.
Shumë e rëndësishme
Është haram agjërimi i ditëve të Teshrikut për atë që nuk është haxhi.
Agjërimi i dy ditëve të Bajramit është i ndaluar.
Kjo argumentohet me hadithin e Ebu Seid el-Hudriut رضي الله عنه:
“Pejgamberi ﷺ ndaloi agjërimin e ditës së Fitër Bajramit dhe të Kurban Bajramit.”
Buhariu dhe Muslimi
Pejgamberi ﷺ ka thënë:
“Dita e Fitër Bajramit, dita e Kurbanit dhe ditët e Teshrikut janë festa jonë si muslimanë dhe ato janë ditë ngrënieje dhe pirjeje.”
Sahih el-Xhami 8192
Kjo tregon se edhe ditët pas Kurbanit janë ditë feste. Ditët e Teshrikut janë tri ditët pas Kurban Bajramit.
Prandaj është haram agjërimi i ditëve të Teshrikut, që janë 11, 12 dhe 13 Dhul-Hixhe.
Pejgamberi ﷺ ka thënë:
“Ditët e Teshrikut janë ditë ngrënieje, pirjeje dhe përmendjeje të Allahut.”
Sahih Muslim
Pra: ngrënie dhe pirje, jo agjërim.
Ebu Murre, shërbëtori i Umm Haniut, transmeton se hyri me Abdullah ibn Amrin tek babai i tij Amr ibn el-Asi, dhe ai u afroi ushqim.
Ai tha: “Ha.”
Tjetri tha: “Unë jam agjërueshëm.”
Amri tha:
“Ha, sepse këto janë ditët për të cilat Pejgamberi ﷺ na urdhëronte të hanim dhe na ndalonte nga agjërimi.”
Ebu Davud 2418 – e saktësoi Albani
Por lejohet agjërimi i ditëve të Teshrikut për haxhiun që nuk ka mundësi të therë kurbanin (hedjin).
Aishja dhe Ibn Omeri رضي الله عنهم kanë thënë:
“Nuk është lejuar agjërimi në ditët e Teshrikut përveç atij që nuk gjen hedj.”
Buhariu 1998
Shejh Ibn Uthejmini رحمه الله ka thënë:
Lejohet për haxhiun që bën Kiran ose Temettu dhe nuk gjen hedj, që t’i agjërojë këto tri ditë, që të mos i humbasë para se të përfundojë Haxhi.
Përveç kësaj, nuk lejohet agjërimi i tyre, edhe nëse dikush ka për detyrë dy muaj agjërim rresht; ai ndërpret agjërimin në ditën e Bajramit dhe tri ditët pas saj, pastaj vazhdon më pas.
Fetvatë e Ramazanit fq. 727
Kush dëshiron të agjërojë “ditët e bardha” të këtij muaji, le të agjërojë 14 dhe 15 Dhul-Hixhe,
sepse dita e 13-të është nga ditët e Teshrikut.
Dhe nëse dëshiron të agjërojë edhe 16-tën ose ditë të tjera të Dhul-Hixhes për t’i plotësuar tri ditët, kjo është më mirë.
Sepse Pejgamberi ﷺ ua rekomandoi disa sahabëve رضي الله عنهم agjërimin e tri ditëve çdo muaj, qofshin ato ditët e bardha apo jo. Por nëse muslimani i agjëron në ditët e bardha, është më mirë.
Fetvatë e Ibn Bazit
Pejgamberi ﷺ ka thënë:
“Bëni vepra të mira gjatë gjithë jetës suaj dhe ekspozohuni ndaj frymëve të mëshirës së Allahut, sepse Allahu ka frymëra mëshire me të cilat prek kë të dojë nga robërit e Tij. Dhe kërkojini Allahut t’jua mbulojë të metat dhe t’jua sigurojë frikërat.”
Es-Silsiletu es-Sahiha 1890
Ringjalleni sunetin
Muhamed Edh-Dhahiri
