Një delegacion i Komisionit Evropian, pritet të vizitojë nesër Prishtinën zyrtare, për të dorëzuar raportin rreth vlerësimi të punës së institucioneve vendore në përmbushjen kritereve për liberalizim të vizave.
Analistët kosovarë vlerësojnë, për Radio Kosovën, se ky vit nuk do të jetë vit i liberalizimit të vizave për qytetarët kosovarë.
Fajin për këtë, sipas tyre e kanë institucionet e vendit që janë përfshirë në skandale korruptive.
Ardhja e zyrtarëve të lartë të Komisionit Evropian për të paraqitur raportin rreth punës që kanë bërë institucionet e Kosovës në përmbushjen e kritereve për liberalizim të vizave, nuk duket të jetë shumë shpresëdhënëse, vlerësojnë analistë të integrimeve evropiane.
Fatmir Curri nga Fondacioni për Shoqëri të Hapur thotë se skandalet e fundit në Ministrinë e Punëve të Brendshme, në veçanti ai për keqpërdorimin e tenderit për pasaportat biometrike, kanë zbehur imazhin e Kosovës, tek institucionet evropiane.
“ Të gjitha premtimet e thëna do të thyhen sepse nuk është e mundur as teknikisht as politikisht që kosovarëve deri në fund të këtij viti të ju liberalizohen vizat. Viti 2013 do të jetë shumë i rëndësishëm sa i përket zbatimit dhe arritjes së kritereve, derisa diku nga mesi i 2014 duhet të shpresojmë që BE-ja të lëviz makinerinë vendimmarrëse, ne ndryshimin e disa rregulloreve, në mënyrë që Kosova të lëviz nga zona e zezë, në zonë e bardhë të Shengenit”.
Edhe Emrush Ukjani, njohës i integrimeve evropiane ndan të njëjtin mendim me pararendësin e tij duke fajësuar institucionet e vendit, të cilat sipas tij, janë përfshirë në afera korruptive, gjë që po i dëmton qytetarët kosovarë.
“Mendoj se në vend që të merret ndonjë konfirmim pozitiv për Kosovën, aferat do ta kenë vendin kryesorë të këtij raporti. Dhe kjo është vërtet diçka shumë e dëmshme për vendin sepse jo vetëm se do të shtyhej procesi si proces, por në të njëjtën kohë do të krijonte një imazh jo të mirë për performancën e institucioneve tona”.
Delegacioni i lartë i komisionit evropianë që pritet të arrijë nesër në Kosovë, do të takohet me ministren e integrimit, Vlora Çitaku, ministrin e drejtësisë, Hajredin Kuçi, ministrin e brendshëm, Bajram Rexhepi dhe zyrtarë të tjerë të zyrës së BE-së dhe EULEX-it, në Kosovë.kohaislame
