Policia e EULEX-it ka arrestuar dy persona lidhur me sulmin ndaj policisë serbe në Dobrosin. Tre persona të tjerë janë nën hetime.
Dy persona janë arrestuar, ndërsa tre të tjerë janë nën hetime lidhur me sulmin e 28 qershorit mbi punktin e policisë serbë në fshatin Dobrosin në kufirin Kosovë-Serbi , njofton EULEX-i.
“Një gjyqtar i EULEX-it ka urdhëruar që të bëhet paraburgimi i dy të dyshuarve në lidhje me një incident me të shtëna ndërmjet Gjilanit dhe Bujanocit afër Portës 5. Tre të dyshuarit e tjerë janë urdhëruar të paraqiten në stacionin e policisë dhe u janë marrë pasaportat”, thuhet në një deklaratë të EULEX-it.
Të dyshuarit, sipas autoriteteve ndërkombëtare të akredituara në Kosovë, janë arrestuar më 1 korrik 2012 nga policia e EULEX-it dhe janë akuzuar për kryerje të veprës terroriste dhe pjesëmarrje në grup terrorist për gjoja gjuajtjen në pikën e kontrollit të policisë serbe afër Portës 5.
“Hetimi i udhëhequr nga një prokuror i EULEX-it nga Prokuroria Speciale e Kosovës është mbështetur nga KFOR-i dhe Policia e Kosovës”, thuhet në një deklaratë për media lëshuar nga EULEX.
Ndryshe në mëngjesin e 28 korrikut persona të panjohur kishin hapur zjarr në punktin e policisë serbe në afërsi të Dobrosinit, ndërsa është raportuar edhe për një polic të plagosur. Ky ishte sulmi i dytë brenda dy muajve në të njëjtën pikë policore.
Stacioni i sulmuar i Policisë, ndërkaq është vetëm disa metra larg varrezave të Dëshmorëve të UÇPMB-së.
Dymbëdhjetë vjet më parë në Dobrosin u formua ish-Ushtria Çlirimtare për Preshevë, Medvegjë dhe Bujanoc, një formacion kryengritësish shqiptarë që luftuan për më shumë të drejta në tri komunat e banuara me shqiptarë në “Serbinë jugore ”.
Kjo strukturë guerile pushoi aktivitetin më 2001, pas një ndërmjetësimi ndërkombëtar.kohaislame
