Shkrimtari amerikan Thomas Friedman, në rubrikën e tij në gazetën New York Times, vlerëson se qeveria e djathtë izraelite, e udhëhequr nga Benjamin Netanyahu, po “mashtron” si Donald Trumpin ashtu edhe hebrenjtë e Shteteve të Bashkuara, duke e përqendruar vëmendjen te rreziku iranian, ndërkohë që në praktikë ndjek një rrugë që kërcënon interesat amerikane dhe sigurinë e hebrenjve në mbarë botën.
Friedman kërkoi ndalimin e kësaj manovrimi dhe quajtjen e gjërave me emrin e tyre, duke thënë se kjo qeveri ekstremiste “pështyn në fytyrë Amerikës” dhe dëshiron që ne të besojmë se kjo është “shi dhe jo pështymë”. Ai e konsideron këtë si mashtrim ndaj Trumpit dhe hebrenjve amerikanë njëkohësisht, dhe thekson se Shtetet e Bashkuara nuk duhet ta lejojnë këtë.
Ai theksoi se fryrja e kërcënimit iranian përdoret politikisht për të mbuluar politikat e zgjerimit dhe aneksimit, veçanërisht në Bregun Perëndimor.
Ai u mbështet edhe në mendimin e ish-kryeministrit izraelit Ehud Olmert, i cili foli për një “përpjekje të dhunshme dhe kriminale” për spastrimin etnik të disa zonave në Bregun Perëndimor përmes sulmeve të kolonëve, me synim detyrimin e palestinezëve të largohen, për t’i hapur rrugë aneksimit të tokës.
Thomas Friedman e konsideron përshpejtimin e aneksimit në Bregun Perëndimor dhe përpjekjen për një prani të përhershme në Gaza, pa u dhënë palestinezëve të drejta politike, si:
Një aventurë “moralisht të pamatur”.
Një “vetëvrasje demografike” që mund ta shndërrojë Izraelin në një sistem të ngjashëm me aparteidin.
Një barrë strategjike për Shtetet e Bashkuara.
Ai përmendi gjithashtu qëndrime si ai i deputetes Alexandria Ocasio-Cortez, e cila ka bërë thirrje për rishqyrtimin e ndihmave të pakushtëzuara për Izraelin.
Ai paralajmëroi se vazhdimi i kësaj rruge do të çojë në:
Rënie të mbështetjes për Izraelin mes të rinjve amerikanë (si republikanë ashtu edhe demokratë).
Përçarje të komuniteteve hebraike në Shtetet e Bashkuara.
Rritje të kritikave në Kongres për ndihmat e pakushtëzuara ndaj Izraelit.
Friedman shkon edhe më tej, duke sqaruar se vazhdimi i këtij kursi do t’i copëtojë komunitetet hebraike mes mbështetësve dhe kundërshtarëve, dhe do t’i vendosë brezat e rinj përballë realitetit të një shteti hebre të izoluar dhe të refuzuar.
Sipas Friedmanit, problemi nuk kufizohet vetëm në politikën e jashtme, por shtrihet edhe brenda Izraelit, ku Netanyahu akuzohet se përpiqet të dobësojë pushtetin gjyqësor, të minojë pavarësinë e institucioneve dhe të pengojë hetimet dhe procedurat që lidhen me sundimin e ligjit.
