Donatori, i cili nuk ishte në dijeni se mbante një mutacion të rrallë TP53 të lidhur me sindromën Li-Fraumeni, mbeti vetë i shëndetshëm pavarësisht rrezikut të lartë të kancerit që shoqëron çrregullimin
Një donator sperme që mbart një mutacion të rrallë gjenetik që rrit rrezikun e kancerit ka sjellë në jetë të paktën 197 fëmijë në mbarë Evropën dhe disa prej tyre tashmë kanë vdekur nga sëmundja, transmeton Anadolu.
Sipas një hetimi të fundit, donatori, i cili nuk ishte në dijeni se mbante një mutacion të rrallë TP53 të lidhur me sindromën Li-Fraumeni, mbeti vetë i shëndetshëm pavarësisht rrezikut të lartë të kancerit që shoqëron çrregullimin.
Siç raporton BBC, ai dha mostra në Bankën Evropiane të Spermës (ESB) të Danimarkës, por sperma e tij përfundimisht u përdor nga 67 klinika në 14 vende dhe numri i fëmijëve të prekur mund të jetë më i lartë, pasi jo të gjitha vendet kanë ofruar të dhëna.
ESB pranoi se sperma e donatorit ishte përdorur në mënyrë të tepruar dhe shprehu “ngushëllimet më të thella” për familjet e prekura.
Nga atje theksuan se mutacioni nuk mund të ishte zbuluar përmes skanimit dhe se ajo “bllokoi menjëherë” donatorin sapo çështja doli në dritë.
Hetimi zbuloi se fëmijët e konceptuar me spermën e këtij donatori kanë lindur në Danimarkë, Belgjikë, Spanjë, Greqi dhe Gjermani, ndërsa mostrat janë dërguar gjithashtu në Irlandë, Poloni, Shqipëri dhe Kosovë, si dhe janë përdorur në trajtime fertiliteti për gra nga Suedia.
Teksa vetëm deri në 20 për qind e spermës së donatorit mbart mutacionin e dëmshëm TP53, i cili mungon në pjesën më të madhe të trupit të tij, çdo fëmijë i konceptuar nga ato spermatozoide të prekura trashëgon mutacionin në çdo qelizë dhe vetëm një pakicë e atyre që e trashëgojnë mutacionin do t’i shpëtojnë kancerit gjatë jetës së tyre.
Sindroma Li-Fraumeni shoqërohet me deri në 90 për qind rrezik gjatë jetës për zhvillimin e kancerit, përfshirë kanceret e fëmijërisë dhe kancerin e gjirit në një moshë më të vonshme.
