Kanal 12 izraelit raportoi se “Izraeli” i ka vënë kushte administratës amerikane për të pranuar shitjen e avionëve luftarakë F-35 Arabisë Saudite, duke kërkuar që çdo marrëveshje të lidhet me normalizim të plotë të marrëdhënieve midis Rijadit dhe Tel Avivit. Lajmi u publikua duke cituar dy zyrtarë të lartë izraelitë.
Sipas të njëjtave burime, Izraeli nuk e kundërshton parimisht furnizimin e Arabisë Saudite me avionë F-35, por thekson se një hap i tillë duhet të jetë pjesë e një pakete të gjerë politike, që do të përfshinte normalizimin e plotë diplomatik.
“Ne i kemi thënë administratës Trump se pajisja e Arabisë Saudite me F-35 duhet të jetë e kushtëzuar me normalizim me Izraelin,” deklaroi një zyrtar izraelit. “Shitja e avionëve pa ndonjë përfitim politik do të ishte një gabim dhe do të shkaktonte dëme.”
Një tjetër zyrtar izraelit kujtoi se ndryshe nga kundërshtimi i fortë ndaj shitjes së F-35 për Turqinë, Izraeli ka më pak shqetësime për Arabinë Saudite nëse furnizimi bëhet në kuadër të bashkëpunimit rajonal të sigurisë, të ngjashëm me marrëveshjet e Abrahamit, siç ndodhi me Emiratet e Bashkuara Arabe.
Megjithatë, burimet izraelite nënvizuan se nëse marrëveshja përparon, Izraeli pritet të kërkojë garanci shtesë sigurie për shkak të afërsisë gjeografike midis dy vendeve. “Distanca mes Arabisë Saudite dhe Izraelit është vetëm çështje minutash fluturimi,” tha një zyrtar, duke shtuar se Izraeli mund të kërkojë që avionët F-35 të mos vendosen në bazat ajrore saudite të lokalizuara në pjesën perëndimore të mbretërisë.
Marrëveshjet e mundshme për F-35 shihen si pjesë e përpjekjeve më të gjera të Uashingtonit për të avancuar një paketë politike dhe të sigurisë mes SHBA-ve, Arabisë Saudite dhe Izraelit, e cila mund të riformësojë ekuilibrat strategjikë në Lindjen e Mesme.
