Ushtria izraelite nisi një ofensivë tokësore në Qytetin e Gazës në agim të së martës, pas orësh bombardimesh të pamëshirshme. Banorët e Gazës thonë se ajo që po përjetojnë është një skenë nga Dita e Gjykimit.

Gazetari palestinez Rami Abu Jamous, i cili është i bllokuar me familjen e tij në apartamentin e tyre në Gaza, e përshkroi situatën aktuale në këtë mënyrë.

“Familja Zarqout, familja Masoud, familja Sultan…” Abu Jamous filloi të rendiste emrat e familjeve që ishin shfarosur në orët e fundit përpara se të shtonte: “Ishte një natë e vështirë, e ngjashme me netët e para të pushtimit dy vjet më parë.”

Në një mesazh audio, Abu Jamous, një kolumnist i rregullt për faqen e internetit të gazetës Orient XXI, e përshkroi qytetin që ishte shndërruar në ferr, duke thënë:

“Me një breshëri të vazhdueshme bombash dhe raketash, qielli u bë i kuq dhe i bardhë. Ndërtesa jonë dridhej sikur të ishte goditur nga një tërmet. Avionë luftarakë dhe helikopterë vazhduan të qarkullonin në qiell. Kishte dhjetëra të vdekur, qindra njerëz në rrugë dhe mijëra të tjerë që përpiqeshin të iknin në jug, me karroca ose në këmbë.”

Vlen të përmendet se autoritetet shëndetësore në Gaza konfirmuan dje se 59 persona u vranë dhe 386 u plagosën në 24 orët e fundit. Ushtria izraelite konfirmoi dje në mëngjes se ka intensifikuar Operacionin Gideon 2, të cilin e nisi rreth një muaj më parë.

Pas sulmeve ajrore të natës, ushtria njoftoi një ofensivë tokësore, me dy divizione ushtarake që lëvizin drejt qendrës së qytetit.

Qindra mijëra banorë të Gazës përpiqen të ikin, por raketat i ndjekin ata, duke rënë kudo, madje edhe në rrugën që të çon në jug.

“Kjo është krejtësisht e re për ne: evakuimi nën zjarrin armik, pa asnjë mbrojtje për civilët”, tha Lotan Iyad Amawiya, një punonjës ndihmash që aktualisht ndodhet në pjesën perëndimore të qytetit, lagjja më e dendur e populluar e Gazës, edhe ajo më e shënjestruar nga ushtria izraelite.

Amawi shpjegon se lëvizja drejt jugut mbart rreziqe të tjera. “Rruga është vetëm 12 kilometra e gjatë, por udhëtimi është i vështirë, pasi nuk ka rrugë ose ujë. Më e rëndësishmja, dhe rreziku më i madh, është mungesa e vendeve për t’u arratisur. E gjithë zona është tashmë e mbipopulluar.”

Amawi, një punonjës ndihmash me OJQ-në Save Gaza, e përshkruan situatën si të ngjashme me tekstet fetare rreth Ditës së Gjykimit. Ai thotë se në ofensivën e tij aktuale, Izraeli ka përdorur bomba të reja, më të fuqishme, aq sa banorët ndiejnë valë tronditëse në të gjithë qytetin me çdo bombardim.

Pavarësisht të gjitha këtyre, Amawi konfirmon se organizata e tij nuk do të largohet nga Gaza për sa kohë që dikush mbetet atje dhe nuk do të kursejë asnjë përpjekje për të siguruar ujë dhe ushqim për ata që janë nën rrethim. /tesheshi.com/