Parashikime shqetësuese për ditët në vijim
Erërat e forta dhe të rrezikshme që do të fryjnë në zonën e Los Anxhelosit javën e ardhshme mund të rindezin zjarret shkatërruese që kanë shpërthyer përgjatë Bregut Perëndimor të Shteteve të Bashkuara për gati dy javë, thanë meteorologët të dielën.
Shërbimi Kombëtar i Motit (NWS) në Los Anxhelos parashikon se erërat e Santa Ana-s do të fryjnë në qytet me shpejtësi deri në 130 km/h nga e hëna në të martë, gjë që mund të nxisë përsëri zjarret.
Informacioni u publikua pasi zjarrfikësit raportuan se po bënin përparim të mirë në përpjekjet për të frenuar zjarrin Eaton pranë Palisades pasi temperaturat ranë dhe erërat u lehtësuan gjatë fundjavës.
Të paktën 27 persona kanë vdekur në zonën e Los Anxhelosit që nga shpërthimi i zjarreve më 7 janar, me më shumë se 12,000 ndërtesa të dëmtuara ose të shkatërruara plotësisht në lagje të ndryshme të qytetit. Disa banorë janë ende të zhdukur.
Zjarri Eaton pranë Pasadenës është aktualisht rreth 73 për qind i kontrolluar, siç është zjarri i Palisades, i cili ka zhdukur lagjet e pasura të banimit në skajin perëndimor të Los Anxhelosit, duke djegur 96 kilometra katrorë, sipas të dhënave nga Departamenti i Pyjeve dhe Mbrojtjes nga Zjarri në Kaliforni.
Mijëra banorë u lejuan të kthehen në shtëpi falë përmirësimit të kushteve të motit gjatë fundjavës, por një thirrje e re është bërë për të gjithë në rajon që të jenë shumë të kujdesshëm në rast se do të detyrohen të evakuohen sërish për shkak të ndryshimit të kushteve të motit.
Shërbimi i motit ka paralajmëruar vazhdimisht se erërat që nxisin flakët mund të rezultojnë në zjarre të reja të shkaktuara nga shkëndijat e mbetura. Shuarja e zjarrit nga ajri bëhet e pamundur nga erërat e forta dhe bimësia shumë e thatë favorizon përhapjen e zjarreve ekzistuese dhe të reja. /tesheshi.com/
