Kryeimami Sahiti, mori pjesë në Konferencën “Maskuniliteti toksik, Feminizmi dhe Femicidi”

Kryeimami i Bashkësisë Islame të Kosovës, Vedat ef. Sahiti, mori pjesë sot në Konferencën “Maskuniliteti toksik, Feminizmi dhe Femicidi”, e cila u mbajt në kuadër të Ditës Ndërkombëtare Kundër Dhunës, e që u organizua nga Qendra për Këshillim, Shërbime Sociale dhe Hulumtime.
Kryeimami Sahiti në këtë Konferencë u paraqit me kumtesën “Qëndrimi islam ndaj dhunës dhe roli i liderëve fetarë në parandalimin e dhunës”.
Ai shfrytëzoi rastin që të flasë për kontributin dhe rolin e liderëve fetarë në parandalimin e dhunës dhe përkushtimin e Bashkësisë Islame të Kosovës në luftimin e dhunës, si dhe angazhimin e imamëve dhe teologëve në riintegrimin e viktimave të dhunës.
Kryeimami Sahiti ndër të tjera tha se Bashkësia Islame e Kosovës mbetet e përkushtuar që të kontribuojë në parandalimin e dhunës në çfarëdo forme qoftë ajo. Ai theksoi gjithashtu edhe faktin se si institucion disa herë kemi mbajtur hytbe të përbashkëta anekënd Kosovës me tema që flasin për ndalimin e dhunës dhe parandalimin e saj.
Gjatë kësaj Konference u paraqit edhe raporti i hulumtimit me temën “Dhuna me bazë gjinore përmes këndvështrimit të gjeneratës Z”.