Presidenti rus, kundrathënës në një qëndrim kritik ndaj së djeshmes
Presidenti rus Vladimir Putin ka thënë se vendimi i Bashkimit Sovjetik për të dërguar tanke në Hungari dhe Çekosllovaki për të shuar protestat masive gjatë Luftës së Ftohtë ishte një gabim.
“Ishte një gabim,” u përgjigj Putin kur u pyet për perceptimin e Rusisë si një fuqi koloniale për shkak të vendimit të Moskës për të dërguar tanke në Budapest në 1956 dhe në Pragë në 1968.
“Nuk është e drejtë të bësh asgjë në politikën e jashtme që dëmton interesat e kombeve të tjera”, tha Putin, i cili dërgoi dhjetëra mijëra trupa në Ukrainë në vitin 2022, duke shkaktuar luftën më të madhe tokësore në Evropë që nga Lufta e Dytë Botërore.
Putin: SHBA po bën të njëjtat gabime si BRSS
Putin tha se Shtetet e Bashkuara po bëjnë të njëjtat gabime si Bashkimi Sovjetik. Ai tha se Uashingtoni “nuk ka miq, ka vetëm interesa”.
Kryengritja hungareze e vitit 1956 u shtyp nga tanket dhe ushtarët sovjetikë. Të paktën 2600 hungarezë dhe 600 ushtarë sovjetikë u vranë në luftime.
Pranvera e Pragës e vitit 1968 përfundoi kur forcat e Traktatit të Varshavës të udhëhequra nga Bashkimi Sovjetik pushtuan Republikën Socialiste Çekosllovake. Rreth 137 çekë dhe sllovakë vdiqën si pasojë e pushtimit, sipas historianëve çekë, raporton Reuters. /tesheshi.com/
