SHBA-ja ka shprehur shqetësim lidhur me bastisjen e kompleksit të xhamisë Al-Aksa në Kudsin Lindor nga ministri izraelit i Sigurisë, Itamar Ben-Gvir, transmeton Anadolu.
“Ne jemi thellësisht të shqetësuar nga vizita në Haram al-Sharif/Malin e Tempullit. Ne besojmë se kjo hapësirë e shenjtë nuk duhet të përdoret për qëllime politike”, tha në një konferencë për media Matthew Miller, zëdhënës i Departamentit të Shtetit.
Miller ftoi të gjitha palët që të respektojnë shenjtërinë e hapësirave të shenjta.
Të dielën, Ben-Gvir i ekstremit të djathtë hyri me forcë në kompleksin e xhamisë Al-Aksa. Pasi hyri brenda, ai pretendoi pronësinë e Izraelit mbi vendin e shenjtë.
Disa vende, përfshirë SHBA-në, Turqinë, Francën, Jordaninë, Katarin dhe Egjiptin, gjithashtu dënuan provokimin dhe retorikën nxitëse të ministrit izraelit.
Lideri i opozitës izraelite, Yair Lapid, gjithashtu kritikoi lëvizjen e ministrit Ben-Gvir, duke e quajtur atë një “njeri të papërgjegjshëm” dhe “fanatik”.
Për muslimanët, Al-Aksa përfaqëson vendin e tretë më të shenjtë të Islamit. Hebrenjtë, nga ana tjetër, e quajnë këtë zonë Mali i Tempullit, duke konsideruar se ishte vendi i dy tempujve hebrenj në kohët e lashta.
Projektet e vendbanimeve
Miller gjithashtu shprehu shqetësim të thellë për vendimet e fundit të qeverisë izraelite për të lejuar qytetarët të vendosen me qëndrim të përhershëm në pjesën veriore të Bregut Perëndimor të pushtuar.
“Ne jemi thellësisht të shqetësuar nga urdhri i fundit i qeverisë izraelite që lejon qytetarët të vendosen me vendbanime të përhershme në Bregun Perëndimor verior, i cili sipas ligjit izraelit, është ndërtuar ilegalisht në tokë private palestineze”, tha Miller i pyetur për vazhdimin e projekteve të vendbanimeve ilegale izraelite.
Miller e quajti urdhrin e qeverisë izraelite si “jokonsistente”.
