Diplomacia e Romës: Ballkani, i një rëndësie strategjike!
Ministri i Jashtëm italian Antonio Tajani tha në Beograd se Ballkani është i një rëndësie strategjike dhe se Italia dëshiron të jetë më e pranishme në atë zonë dhe se dëshiron Serbinë në Bashkimin Evropian.
“Ballkani është pjesë e Evropës, Ballkani ka rëndësi strategjike, atje jetojnë miqtë tanë me të cilët kemi bashkëpunuar dhe bashkëpunojmë”, tha Tajani, duke theksuar se Italia dëshiron Serbinë në Bashkimin Evropian dhe se dëshiron të forcojë më tej marrëdhëniet miqësore që kanë qenë në vend deri tani.
“Besoj se Vuçiç dhe qeveria do të kontribuojnë në zhvillimin e bashkëpunimit mes dy vendeve dhe do të ndërtojnë një rrugë të rëndësishme për stabilitetin e Ballkanit dhe të gjithë Evropës”, tha kreu i diplomacisë italiane.
Së bashku me Vuçiçin, Tajani po merr pjesë në Forumin për Bashkëpunim Biznesor dhe Shkencor ndërmjet Serbisë dhe Italisë, i cili mblodhi 151 kompani italiane dhe 246 serbe në Beograd.
Përmirësimi i marrëdhënieve ekonomike
Dy liderët diskutuan për përmirësimin e mëtejshëm të marrëdhënieve ekonomike dhe investimet e reja. Tajani theksoi se tubimi i sotëm është pjesë e një strategjie më të gjerë dhe se një tubim i ngjashëm është planifikuar të mbahet vitin e ardhshëm në Trieste.
Në hapje të forumit, Vuçiç tha se ndihet krenar për faktin se në Serbi është krijuar një atmosferë e favorshme për biznes dhe shtoi se Italia është një mik i sinqertë për Serbinë, ku mund të mbështetet gjithmonë. Ai shtoi se financat publike janë në gjendje të mirë dhe se Serbia ka arritur të tërheqë 63 për qind të investimeve të huaja direkte në tre vitet e fundit.
Kompanitë italiane tregojnë interesin më të madh për investimet në Serbi që lidhen me energjinë dhe tranzicionin e gjelbër, bujqësinë dhe infrastrukturën.
Italia është partneri i tretë tregtar më i rëndësishëm i Serbisë dhe një nga investitorët më të mëdhenj të huaj. /tesheshi.com/
