Departamenti amerikan i Shtetit paralajmëroi për udhëtime drejt Bjellorusisë dhe Moldavisë mes rritjes së aktivitetit ushtarak rus, duke u kërkuar qytetarëve amerikanë të mos udhëtojnë në ato vende dhe që ata të largohen nga këto vende.
Në deklaratën e Departamentit të Shtetit për Bjellorusinë thuhet: “Mos udhëtoni në Bjellorusi për shkak të zbatimit arbitrar të ligjit, rrezikut të ndalimit dhe ngritjes së pazakontë ushtarake ruse përgjatë kufirit të Bjellorusisë me Ukrainën, llojit të ri të koronavirusit (Covid-19) dhe kufizimeve të lidhura me hyrjen. Qytetarët amerikanë në Bjellorusi duhet të largohen menjëherë nga ky vend me anë të linjave komerciale apo në mënyrë private.”
Duke kujtuar se më 31 janar 2022, Departamenti i Shtetit urdhëroi anëtarët e familjeve të punonjësve të qeverisë amerikane të largoheshin nga Ambasada e Minskut, u vu re se alarmi i udhëtimit për Bjellorusinë ishte ngritur në “Nivelin e 4-t”.
“Rritja e aktivitetit të pazakontë dhe alarmues ushtarak rus pranë kufirit ukrainas e bëri situatën të paparashikueshme”, thuhet në deklaratë.
“Ngacmimi i mundshëm, veçanërisht duke synuar të huajt, është gjithashtu i mundur. Duke pasur parasysh ndryshueshmërinë në rritje të situatës, qytetarët e SHBA-së këshillohen fuqimisht të mos udhëtojnë në Bjellorusi”, thuhet në deklaratë.
Në deklaratë gjithashtu thuhet se aftësia e qeverisë amerikane për të ofruar shërbime rutinë ose urgjente për qytetarët amerikanë në Bjellorusi është tashmë shumë e kufizuar për shkak të kufizimeve të qeverisë bjelloruse në lidhje me stafin e ambasadës së SHBA.
Departamenti i Shtetit ngriti gjithashtu nivelin e alarmit të udhëtimit për Moldavinë në nivelin më të lartë, duke paralajmëruar qytetarët amerikanë.
Në deklaratën e Departamentit në lidhje me këtë çështje thuhet: “Mos udhëtoni në Moldavi për shkak të Covid-19, aktiviteteve të pazakonta dhe alarmante ushtarake ruse rreth Ukrainës dhe konfliktit të pazgjidhur midis rajonit separatist Transnistrisë dhe qeverisë qendrore. Qytetarët amerikanë në këtë rajon duhet të largohen menjëherë nga ky vend me anë të linjave komerciale apo në mënyrë private.”
