Një panel i Qeverisë amerikane ka votuar për të rekomanduar vaksinën kundër koronavirusit të kompanisë Pfizer/BioNTech, edhe për fëmijët e moshës nga pesë deri në 11 vjeç.
Ekspertët e Administratës amerikane për Ushqim dhe Ilaçe (FDA) kanë përkrahur këtë vendim të martën, duke i hapur rrugën autorizimit brenda disa javësh.
Në muajin shtator, kompania Pfizer ka thënë se të dhënat kanë treguar që vaksina kundër koronavirusit është e sigurt për atë grup-moshë.
SHBA-ja veçse është duke vaksinuar fëmijët e moshave nga 12 vjeç e lart.
Vendimi i fundit prek rreth 28 milionë fëmijë amerikanë.
Ky vendim tani pret miratim nga FDA dhe Qendrat për Parandalimin dhe Kontrollin e Sëmundjeve.
Ekspertët e FDA-së kanë thënë se janë të bindur se përfitimet e vaksinës tejkalojnë rreziqet.
Të dhënat zyrtare në SHBA tregojnë se 160 fëmijë të moshave pesë deri në 11 vjeç, kanë vdekur me koronavirus, prej shpërthimit të pandemisë.
Në total, SHBA-ja ka regjistruar rreth 740,000 vdekje nga ky virus.
