Ministria e Arsimit dhe Shkencës thotë se Ligji i ri për librat shkollorë dhe materialet e tjera mësimore dhe didaktike, i cili është pjesë e planit për reformimin e sistemit kombëtar të arsimit, është përgatitur bazuar në analizën e praktikave pozitive nga disa vende të zhvilluara në Evropë që kanë tejkaluar sistemin e përdorimit të teksteve klasike.
Në një kumtesë për media, Ministria e Arsimit dhe Shkencës shprehet se krijimi i një sistemi të burimeve të hapura arsimore është tendencë drejt së cilës po përpiqen vendet në zhvillim, përfshirë Maqedoninë e Veriut.
“Nuk do të ketë më vetëm një burim informacioni për secilën lëndë, por do të përdoren deri në tre libra shkollorë, të cilët i drejtojnë studentët të hulumtojnë dhe të analizojnë përpara se të nxjerrin konkluzione dhe të ruajnë njohuritë. Nga ana tjetër, dixhitalizimi do të sigurojë qasje të lehtë në materialet mësimore, të cilat bëhen interaktive dhe pasurohen me përmbajtje multimediale – filma, animacione, video, galeri imazhesh dhe detyra, si dhe përditësimin e tyre të thjeshtë me të dhënat dhe faktet më të fundit para fillimit të çdo viti shkollor”.
“Sidoqoftë, duke marrë parasysh autonominë e mësuesve në zgjedhjen e materialeve dhe mjeteve mësimore, ata mund të shtypin disa nga materialet për nevojat e klasës, dmth shkollat do të jenë në gjendje të shtypin plotësisht tekstin shkollor për secilin nxënës që për ndonjë arsye bën të mos kenë mundësi të përdorin libra shkollorë elektronikë”, thonë nga Ministria e Arsimit dhe Shkencës.
Më tej nga MASH thonë se materialet mësimore mbeten falas për të gjithë nxënësit, përfshirë studentët me shikim të dobët për të cilët shteti do të shtypë libra shkollorë në alfabetin Brail, përveç disponueshmërisë së secilit libër shkollor në formatin audio./Telegrafi/
