ASTANA (AA) – Kreu i delegacionit rus në bisedimet e paqes për Sirinë në Astana, Alexander Lavrentiyev deklaroi se mosardhja e delegacionit të SHBA-së tregon se Washingtoni ka hequr dorë nga përpjekja për një zgjidhje paqësore të krizës në Siri, raporton Anadolu Agency (AA).
Dje me takime dypalëshe në Astana, kryeqytetin e Kazakistanit, filloi raundi i nëntë i bisedimeve të paqes për Sirinë ndërsa në takim sot pritet pjesëmarrja e të gjitha palëve.
Delegacionet e vendeve garantuese të procesit Turqia, Rusia dhe Irani dje kanë mbajtur konsultime të ndërsjella, kurse këtë mëngjes në Astana arriti edhe delegacioni i opozitës siriane.
Delegacioni përbëhet nga 24 përfaqësues të grupeve opozitare nga të gjitha pjesët e Sirisë, ndërsa shef i Delegacionit është ish-kryeministri i qeverisë së përkohshme të Sirisë, Ahmet Tuma.
Në orët e pasdites do të mbahet takimi qendror, ku delegacioni i regjimit sirian dhe opozitës do të ulen në tryezë. Përveç delegacioneve të vendeve garantuese si vëzhgues në negociata do të marrë pjesë dhe i dërguari i posaçëm i OKB-së për Sirinë, Staffan de Mistura dhe delegacioni i Jordanisë.
– Palët arrijnë marrëveshje mbi deklaratën përfundimtare
Palët në mbledhjen e 9-të të Astana-s, kanë arritur marrëveshje mbi deklaratën përfundimtare.
Sipas informacionit të marrë nga burimet që marrin pjesë në mbledhje, në bisedime është diskutuar për mbrojtjen e armëpushimit në Zonën e Deeskalimit të Tensioneve të Idlibit.
Palët janë dakorduar mbi rëndësinë dhe vazhdimin e mandatit të pikave të vëzhgimit të krijuara nga Turqia në Idlib, në kuadër të misionit për vëzhgimin e armëpushimit.
Nga ana tjetër mësohet se është arritur avancim në mbledhje e dytë të djeshme të grupit të punës së formuar për lirimin e personave të privuar nga liria, ndërsa është vlerësuar se mbledhja e tretë të mbahet muajin e ardhshëm në Turqi.
Në deklaratën përfundimtare është pasqyruar edhe qëndrimi i përbashkët mbi elemente siç, uniteti dhe integriteti i Sirisë, roli i Zonave të Deeskalimit të Tensioneve në zvogëlimin e dhunës dhe vazhdimin e armëpushimit në vend, sigurimi i kushteve të nevojshme për kthimin e migrantëve, lufta e përbashkët kundër terrorizmit, përshpejtimin e përpjekjeve për krijimin e komitetit kushtetues nën patronazhin e Kombeve të Bashkuara.
– Delegacioni i SHBA-ve nuk iu përgjigj bisedimeve të Astana-s
Kreu i delegacionit rus dhe i dërguari i posaçëm i presidentit të Rusisë Vladimir Putin, Alexander Levrentiev mbrëmë ka thënë se Washingtoni shihet se ka hequr dorë për të mbështetur përpjekjet ndërkombëtare për zgjidhjen e krizës në Siri në mënyrë paqësore.
Procesi negociues i bisedimeve të paqes në Astana ishte inicuar në janar të vitit të kaluar ndërsa vendet garantuese janë Turqia, Rusia dhe Irani. Takimi i fundit, raundi i tetë i bisedimeve u mbajt në dhjetor.
