Bejrut, 17 korrik – Kryengritësit kanë vrarë në Liban njërin prej përkrahësve kryesorë të presidentit sirian, Bashar al Asad, e që është konsideruar shenjë e fundit se lufta nga Siria po përhapet drejt fqinjit.
Mohammad Darra Jamo, komandat i cili punoi për mediat shtetërore siriane dhe shpesh paraqitej në emisione, është sulmuar në shtëpinë e tij në qytetin Sarafand. Gruaja e tij, e cila ishte me të gjatë këtij sulmi, tha se zyrtarët nga partia e presidentit Assad, Baath, e kishin paralajmëruar që të ketë kujdes.
Siç transmeton KTV, për këtë sulm mediat shtetërore siriane akuzuan ‘grupet terroriste’, siç i quajnë kryengritësit çlirimtarë.
Kjo ishte vrasja e parë e ndonjë përkrahësi të Asadit në Liban që nga fillimi i luftës para më shumë se dy vjetëve.
Libani është duke u përpjekur të distancohet nga konflikti në Siri, por sulmet me vetura bombë dhe përleshjet mes përkrahësve dhe kundërshtarëve të pushtetit në Siri janë bërë përditshmëri.
