Transmetojnë imamët: Ahmedi, Termidhiu dhe Ibën Maxhe nga Muadh ibën Xhebeli, i cili ka thënë: “Isha me të Dërguarin, lavdërimi dhe shpëtimi i Allahut qofshin për të, në një udhëtim dhe një ditë, përderisa po ecnim, iu afrova dhe i thashë: “O i Dërguar i Allahut! Më trego për ndonjë vepër që më shpie në xhenet dhe më largon nga zjarri!”
I Dërguari, lavdërimi dhe shpëtimi i Allahut qofshin për të, tha: “Tanimë më ke pyetur për një gjë madhështore, mirëpo ajo është e lehtë për atë që ia ka lehtësuar Allahu; ta adhurosh Allahun dhe të mos i shoqërosh Atij askënd, ta falësh namazin, ta nxjerrësh zekatin (e pasurisë), ta agjërosh Ramazanin dhe ta kryesh haxhin.”
Pastaj vazhdoi dhe tha: “A nuk dëshiron të të shpie në dyert e hajrit? Agjërimi është mburojë (nga zjarri i xhehenemit). Lëmosha e shuan mëkatin ashtu sikur e shuan uji zjarrin. Namazi i njeriut në fillimin e 1/3 së fundit të natës është simboli i njerëzve të mirë.” Pastaj lexoi i Dërguari, lavdërimi dhe shpëtimi i Allahut qofshin për të, ajetet e Kuranit: “I heqin trupat e tyre prej dyshekëve, duke e lutur Zotin e tyre nga frika dhe nga shpresa dhe nga ajo që Ne u kemi dhënë (pasuria) atyre, ata japin. Pra, për ata që kanë vepruar nuk di askush për atë kënaqësi (të zemrës e shpirtit) që u është caktuar atyre si shpërblim.” (Sexhde, 16,17)
Pas kësaj i Dërguari, lavdërimi dhe shpëtimi i Allahut qofshin për të, më tha: “A nuk dëshiron të të informoj për bazën e çdo gjëje, shtyllën e tyre dhe gjënë më të lartë të tyre?” Gjithsesi o i dërguar i Allahut, – iu përgjigja.
“Baza e çdo gjëje është Islami (dëshmitë – shehadetet), ndërsa shtylla e tij është namazi, kurse gjëja më e lartë e tij është xhihadi.”
“A nuk do të të tregoj për brumosjen e gjithë kësaj?” – më tha pastaj i Dërguari
“Po si jo, o i dërguar i Allahut”, – i thashë.
E kapi gjuhën e tij dhe më tha: “Përmbaje këtë!”
O i dërguar i Allahut, ne fajësohemi për atë që flasim? – i thashë.
“Mbettë nëna pa ty, o Muadh! E kush i përmbys njerëzit në zjarr me fytyrat e tyre apo me vrimat e hundëve të tyre, përveç produktet e gjuhëve të tyre (fjalëve të kota).
Dobi të nxjerra nga ky hadith
Nga ky hadith shihet qartë vlera e adhurimeve të përmendura: namazit, zekatit, agjërimit dhe haxhit, gjithnjë duke i paraprirë besimi i pastër dhe adhurim i çiltër, duke iu larguar të gjitha formave të mundshme të shoqërimit dhe ortakërisë (shirkut) së Allahut të Lartësuar. Pra, këto gjëra janë çelës i përcaktimit të statusit të njeriut në Ditën e Gjykimit, banor i xhenetit të jetë apo i xhehenemit. Pastaj përmenden edhe vepra vullnetare ndihmëse prej llojit të tyre si: agjërimi, lëmosha dhe namazi i natës.
I dërguari i Allahut, lavdërimi dhe shpëtimi i Allahut qofshin për të, në këtë mesazh të drejtuar atyre që kanë ambicien e përcaktimit për xhenet dhe frikën që të mos jenë nga banorët e xhehenemit, tregon se si të ruhen këto vlera të adhurimit, duke treguar se baza e ndërtimit të këtyre është besimi, shtylla në të cilën mbahen është namazi, kurse kulmari i mbrojtjes së këtyre adhurimeve është xhihadi.
Po ashtu i dërguari i Allahut, lavdërimi dhe shpëtimi i Allahut qofshin për të, tërheq vëmendjen në mëkatet e mëdha dhe të vogla, duke sqaruar se rreziku nga fjalët e kota, përçmuese, tendencioze, lënduese etj. është i madh sa lehtë mund ta hedhin njeriun në zjarr me fytyrën e tij.
Përktheu dhe punoi:
Muhamed Dërmaku
09.06.2006
