Albanese: Asnjë lidhje midis njohjes së shtetit palestinez dhe ngjarjes së rëndë!
Kryeministri australian Anthony Albanese ka hedhur poshtë kategorikisht pretendimet e Benjamin Netanyahut se njohja e shtetit palestinez nga qeveria e tij ka kontribuar në rritjen e antisemitizmit, ndërsa sqaroi se nuk ka lidhje me sulmin terrorist në plazhin Bondi të Sidneit.
Duke iu përgjigjur një pyetjeje nga Korporata Australiane e Transmetimeve nëse ai beson se ka një lidhje midis njohjes së shtetit palestinez nga Australia në fillim të këtij viti dhe sulmit terrorist të djeshëm, Albanese ishte kategorik. “Jo, nuk e shoh,” tha ai, duke hedhur poshtë pretendimin e Benjamin Netanyahut se vendimi “i hedh benzinë zjarrit të antisemitizmit”.
Kryeministri australian shtoi se “shumica dërrmuese e vendeve në botë e pranojnë se zgjidhja me dy shtete është rruga përpara në Lindjen e Mesme”, duke nënvizuar dimensionin ndërkombëtar të qëndrimit të Australisë ndaj çështjes palestineze.
Të dielën, Netanyahu tha se në një letër që i dërgoi homologut të tij australian në gusht, i kishte bërë thirrje që të “zëvendësonte dobësinë me veprim dhe qetësimin me vendosmëri”, duke argumentuar se Albanese kishte “zëvendësuar dobësinë me më shumë dobësi dhe qetësimin me edhe më shumë qetësim”.
I pyetur për komentet, Albanese tha se roli i tij në këtë moment “është të bashkojë kombin dhe të promovojë unitetin”, duke vënë në dukje se terroristët kërkojnë “të na ndajnë si komb, të kthejnë një australian kundër një tjetri”.
Ai i vuri theks të veçantë mbështetjes së komunitetit hebraik të vendit, duke theksuar: “Ne duhet të përqafojmë anëtarët e komunitetit hebraik që po kalojnë një kohë jashtëzakonisht të vështirë, jo vetëm ata që po vajtojnë të dashurit dhe miqtë, por çdo anëtar të komunitetit hebraik në Australi”. Ai shtoi se “24 orët e fundit kanë qenë jashtëzakonisht traumatike” dhe theksoi se detyra e tij është “të ofrojë mbështetje për komunitetin hebraik dhe ta bëjë të qartë se australianët, në shumicën dërrmuese të tyre, qëndrojnë pranë tyre në këtë kohë të vështirë”. /tesheshi.com/
