Në kuadër të bashkëpunimit të nisur në vitin 2004 ndërmjet Qendrës Klinike Universitare të Kosovës (QKUK) dhe Qendrës Klinike Universitare të Linkoping të Suedisë, një ekip mjekësor suedez po qëndron në QKUK, ku në bashkëpunim me mjekët kirurg të fëmijëve dhe kirurg plastikë nga QKUK po kontrollojnë dhe trajtojnë pacientë në QKUK.
Ekipi mjekësor udhëhiqet nga menaxherja ndërkombëtare e projektit, Ruhije Hoxha Beganovic.
Ekipi mjekësore ka ardhur në Kosovë më 9 prill, ku kanë filluar menjëherë që bashkë me kolegët nga QKUK të trajtojnë rastet në Klinikën e Kirurgjisë së Fëmijëve dhe në Kirurgji Plastike.
Ekipin mjekësor nga Kirurgjia e Fëmijëve po e udhëheqë Peder Drott, i cili ka edhe ekipin mbështetës mjekësor. Deri tani janë kryer mbi 20 trajtime, përfshirë edhe ndërhyrjet kirurgjike, ndërsa trajtimet do të vazhdojnë deri ditën e premte.
Në anën tjetër, në kirurgji plastike, të udhëhequr nga Erkki Torpila, mjekë të tjerë dhe ekipi vendore e kirurgëve plastik, të martën kanë kryer 5 operacione mikro-kirurgjike, 5 të tjera janë në program sot dhe të tjerat gjatë të enjtes.
Po ashtu u tha se janë kontrolluar dhe trajtuar edhe 48 pacientë të tjerë./tg
