Një video e transmetuar nga aktivistë tregoi momentin e shpërthimit të zjarrit në anijen kryesore të flotës ndërkombëtare të “Qëndresës” për thyerjen e rrethimit mbi Gazën, pranë brigjeve të Tunizisë, në orët e para të së martës.
Në video shfaqet një varkë në det mbi të cilën bie një objekt i ndezur nga lart, çka shkaktoi shpërthimin e zjarrit në pjesë të saj.
“Komiteti Ndërkombëtar për Thyerjen e Rrethimit mbi Gazën”, i cili publikoi videon në faqen e tij në Facebook, tha se pamjet janë filmuar nga një tjetër anije e flotës dhe tregojnë çastin kur varka “Family” u “godit” nga lart.
Më herët, drejtuesit e flotës së “Qëndresës” njoftuan se anija kryesore u sulmua në orët e para të mëngjesit të së martës, duke shkaktuar shpërthimin e zjarrit.
Tiago Avila, anëtar i administratës së flotës, tha për Al Jazeera se anija “Family” u godit nga një dron zjarrvënës pranë brigjeve të Tunizisë, ndërkohë që në bord ndodheshin disa anëtarë të ekipit, por pa u lënduar. Nga ana tjetër, zëdhënësi i flotës, Seif Abu Kshk, theksoi se pavarësisht sulmit, anijet do të vazhdojnë lundrimin.
Flota ishte planifikuar të nisej nga porti Sidi Bou Said në Tunizi, me synim të thyejë rrethimin izraelit mbi Gazën.
Mohimi nga Tunizia
Policia tuniziane arriti të shuajë zjarrin dhe deklaroi se nuk pati të lënduar. Ndërkohë, zëdhënësi i Gardës Kombëtare të Tunizisë tha për Al Jazeera se zjarri në anijen e flotës së “Qëndresës” ishte rezultat i një defekti të brendshëm dhe jo i një droni, duke shtuar se hetimet e para tregojnë se flakët nisën nga një jelek shpëtimi i ndezur.
Nga ana e saj, raportuesja speciale e OKB-së për të drejtat e njeriut në territoret palestineze, Francesca Albanese, shkroi në platformën X se skenari më i mundshëm është se anija u sulmua nga një dron.
Albanese shtoi se dy anije të flotës janë rrugës për në Tunizi dhe kanë nevojë për mbrojtje urgjente.
Agjencia Reuters, duke cituar ekipin e flotës, raportoi se anija e sulmuar kishte në bord anëtarë të komitetit drejtues të flotës.
*Protesta në Tunizi
*
Protestues tunizianë brohoritën slogane kundër Izraelit dhe valëvitën flamuj palestinezë në portin e Sidi Bou Said, pas lajmeve për sulmin ndaj anijes së flotës së “Qëndresës”.
Flota më e madhe
Gjatë dy ditëve të fundit, rreth 20 anije nga Spanja kanë mbërritur me grupe në portin e Sidi Bou Said pranë kryeqytetit Tuniz, si pjesë e flotës që synon të niset drejt Gazës për të dërguar ndihma humanitare dhe për të thyer rrethimin izraelit.
Flota u nis nga Spanja në fund të muajit gusht dhe përbën nismën më të madhe ndërkombëtare të këtij lloji për thyerjen e rrethimit, me pjesëmarrjen e përfaqësuesve nga 44 vende dhe me mbështetjen e organizatave ndërkombëtare si “Koalicioni i Flotës së Lirisë”, “Lëvizja Globale për në Gaza”, “Flota e Qëndresës Magrebine” dhe “Qëndresa Nusantara” nga Azia Lindore.
Kjo flotë konsiderohet më e madhja e këtij lloji si për numrin e anijeve ashtu edhe të pjesëmarrësve, dhe ndiqet me interes ndërkombëtar përballë sfidave dhe pengesave të pritshme nga Izraeli.
Anëtari i komitetit drejtues të flotës së “Qëndresës Magrebine”, Wael Nuar, tha se lundrimi drejt Gazës do të fillojë të mërkurën pas përfundimit të përgatitjeve, me pjesëmarrjen e rreth 60 anijeve dhe më shumë se një mijë aktivistëve nga e gjithë bota.
Deri tani, administrata e flotës ndërkombëtare të “Qëndresës” nuk ka bërë të ditur nëse sulmi i sotëm do të ndikojë mbi afatin e nisjes së planifikuar.
Burimi: Al Jazeera + Rrjete sociale
