Raporti i fundit i “Freedom House” radhiti Shqipërinë dhe Kosovën në mesin e vendeve me liri të pjesshme. Sipas kritereve të “Freedom House”, vend me liri të pjesshme cilësohet shteti që ka kufizim të respektimit të lirive politike dhe atyre civile.
Shtetet e tilla vuajnë shpesh nga një mjedis i korruptuar, sundimi i dobët i ligjit, grindjet fetare e etnike dhe nga dominimi i skenës politike nga një parti e caktuar.
Vlerësimi i shkallës së lirisë në botë bëhet në bazë të drejtave politike e të drejta civile.
Vlerësimet nga 1 deri në 2.5 vlejnë për vendet e lira, nga 3 në 5 vendet me liri të pjesshme dhe nga 5.5 në 7 vendet jo të lira.
Shqipëria krahasuar me një vit më parë, ndodhet pothuajse në shkallën e njëjtë të vlerësimit. Sivjet ajo ka marrë notën 3 për dallim nga një vit më parë kur ishte vlerësuar me 3.5.
Kosova ndërkaq ka vlerësime të njëjta në dy shtyllat kryesore që, sipas Freedom House, përcaktojnë lirinë e një vendi. Ajo edhe sivjet ka marrë notën 5 për të drejtat politike dhe 4 për liritë civile.
Nga vendet e rajonit, bashkë me Shqipërinë dhe Kosovën, në radhën e vendeve me liri të pjesshme janë edhe Bosnja dhe Maqedonia.
Ndërsa, Serbia, Kroacia e Mali i Zi, radhiten në mesin e vendeve të lira.
Raporti vlerëson se numri i vendeve të lira në vitin 2012 ishte 90, apo 46 për qind e 195 shteteve në botë. Numri i vendeve me liri të pjesshme është 58 apo 30 për qind të shteteve të përfshira në vlerësim, ndërsa 47 vende apo 24 për qind e vendeve në botë, janë jo të lira.
Në raport thuhet se ky është viti i shtatë me radhë që liria në botë shënon rënie.
