Rexhep Tajjip Erdogan, presidenti i Turqisë, do të ishte mes njerëzve që do të merrnin pjesë në ceremoninë e faljes së xhenazes së Muhammed Aliut.
Veç kësaj, ai do t’i kushtonte një shkrim një prej figurave më emblematike të dekadave të fundit, që nga një boksier u kthye në frymëzues e shembull për miliona njerëz anekënd botës.
Ja ç’shkruan mes të tjerash kreu i shtetit turk në shkrimin e botuar në Bloomberg:
“Dikush mund të vrasë mendjen pse duhet të fluturojë presidenti i Turqisë për të marrë pjesë në funeralin e një boksieri amerikan. Përgjigjja është e thjeshtë: do t’i bëj nderimet e mia Muhammed Aliut në emër të popullit turk, sepse historia e tij e jashtëzakonshme nuk duhet të përfundojë këtu. Duke i vënë në jetë idealet e tij, udhëheqësit botërorë mund t’i trajtojnë shumë probleme të vazhdueshme.
Muhammed Aliu ishte një sportist i jashtëzakonshëm dhe një krijesë njerëzore e jashtëzakonshme. Gjindja anekënd botës nuk qe tërhequr vetëm nga intensiteti dhe atletizmi i Aliut, por gjithashtu nga qëndrimet e tij politike.
Një musliman i sinqertë, Aliu, si shumë nga ne, qe shqetësuar nga bashkëshoqërimi i papërgjegjshëm i Islamit me dhunën. Çfarë e lëndoi atë, siç tha ai pas sulmeve terroriste të 11 shtatorit, qe fakti se, ‘është përfshirë emri i Islamit. Islami nuk është një fe vrasëse. Islam do të thotë paqe. Nuk mund të qëndroj në shtëpi dhe të shoh se si njerëzit i etiketojnë muslimanët si arsyen për këtë problem.’ Dhe ai kishte të drejtë në atë që do të kthehej në fund në një fushatë diskriminuese kundër një bashkësie prej 1.7 miliardë besimtarësh anembanë botës.
Mënyra më e mirë për ta nderuar kampionin e popullit është vënia në jetë e vizionit të tij të lirisë, barazisë dhe solidaritetit.” /tesheshi.com/
