Pohimi: Përpjekja për të aneksuar Bregun Perëndimor, një vijë e kuqe!
Çdo përpjekje nga Izraeli për të aneksuar pjesë të Bregut Perëndimor do të ishte një vijë e kuqe për Shtetet e Bashkuara – dhe do të nënkuptonte fundin e normalizimit diplomatik arabo-izraelit, tha Emmanuel Macron, duke pretenduar se premtimi iu bë nga Presidenti i SHBA-së Donald Trump.
Macron zbuloi gjithashtu se i paraqiti presidentit të SHBA-së një plan trefaqësh mbi të ardhmen e Palestinës, bazuar në Deklaratën e Nju Jorkut – një dokument i mbështetur nga më shumë se 143 vende, i cili propozon përjashtimin e Hamasit nga qeveria e ardhshme në Gaza dhe Bregun Perëndimor.
Duke folur për France 24, Macron tha se qëllimi i takimit të tij me Trump të martën ishte që Amerika, Evropa dhe vendet arabe të ishin në të njëjtën linjë.
Kur u pyet për planet izraelite për të zgjeruar vendbanimet në Bregun Perëndimor – duke përfshirë korridorin E1, ku janë planifikuar 3,400 shtëpi të reja – ai u përgjigj:
“Për këtë çështje, evropianët dhe amerikanët janë shumë qartë në të njëjtën linjë,” shkruan The Guardian.
Zyrtarët britanikë kanë shprehur shqetësim se Donald Trump mund të njohë sovranitetin izraelit mbi vendbanimet e paligjshme në Bregun Perëndimor në hakmarrje për vendimin e Britanisë, Australisë, Francës dhe të tjerëve për të njohur Palestinën. Një veprim i tillë do të ishte një goditje serioze për çdo zgjidhje me dy shtete.
Por Macron tha se çdo përpjekje për të aneksuar Bregun Perëndimor “do të nënkuptonte fundin e Marrëveshjeve të Abrahamit, të cilat ishin një nga historitë e suksesit të administratës së parë Trump. Emiratet e Bashkuara Arabe ishin shumë të qarta për këtë.”
Ai shtoi: “Mendoj se kjo është një vijë e kuqe për Shtetet e Bashkuara.”
Komentet e Macron dhanë pamjen më të qartë deri më tani të diplomacisë prapa skenave në lidhje me planet për “ditën pas” konfliktit të Gazës.
Trump e sheh nënshkrimin e Marrëveshjeve të Abrahamit në vitin 2020, të cilat normalizuan marrëdhëniet midis Izraelit dhe një grupi shtetesh arabe, përfshirë Emiratet e Bashkuara Arabe, si një nga arritjet e tij më të mëdha diplomatike në mandatin e tij të parë.
Nëse Trump këmbëngul që aneksimi të mos ndodhë, kryeministri izraelit Benjamin Netanyahu do të gjendet në telashe serioze politike, pasi pjesë të koalicionit të tij të ekstremit të djathtë po kërkojnë që Izraeli të aneksojë pjesërisht ose plotësisht Bregun Perëndimor, veçanërisht Luginën e Jordanit.
Nga ana tjetër, nëse Netanyahu vazhdon me aneksimin – me miratimin ose heshtjen amerikane – zgjidhja me dy shtete, në të cilën një shtet palestinez do të ekzistonte përkrah Izraelit, do të dëmtohej seriozisht. Netanyahu është planifikuar të takohet me Trump në Shtëpinë e Bardhë të hënën dhe do t’i drejtohet Asamblesë së Përgjithshme të OKB-së të premten.
Makron tha se qëllimi kryesor i planit të tij shumëfazor “krejtësisht të ri” është të arrijë një armëpushim dhe të lirojë të gjithë pengjet.
Ai tha se kishte folur drejtpërdrejt me Trump-in në takim, duke i thënë: “Ju keni një rol të madh dhe doni të shihni paqe në botë”.
Ai shtoi: “Ne duhet t’i bindim amerikanët të ushtrojnë presion mbi Izraelin”, sepse SHBA-të janë “një vend me ndikim të vërtetë”.
I dërguari special i Trump-it, Steve Witkoff, tha gjithashtu se presidenti amerikan paraqiti një plan me 21 pika për paqen në Lindjen e Mesme para udhëheqësve rajonalë arabë dhe myslimanë në një takim të martën.
“Shpresojmë – dhe do të thoja se jemi madje të sigurt – që në ditët në vijim do të jemi në gjendje të njoftojmë një lloj përparimi”, tha Witkoff në margjinat e Asamblesë së Përgjithshme të OKB-së.
Macron shtoi se njohja e një shteti palestinez nga Franca kishte për qëllim hapjen e procesit të paqes, të cilin ai e quajti mënyra më e mirë për të izoluar Hamasin. Qëllimi ishte çmilitarizimi dhe shpërbërja e grupit militant, theksoi ai.
Por ai vuri në dukje se disa anëtarë të krahut të djathtë të qeverisë izraelite janë më të përqendruar në shkatërrimin e çdo marrëveshjeje politike: “Qëllimi i disave nuk është të luftojnë Hamasin, por të bllokojnë rrugën drejt paqes”, tha ai, duke shtuar: “Nuk ka Hamas në Bregun Perëndimor”.
Ai theksoi se strategjia e “luftës totale” e Netanyahut kishte dështuar, sepse rrezikonte pengjet pa ulur numrin e luftëtarëve të Hamasit: “Ka të njëjtin numër luftëtarësh të Hamasit si më parë. Lufta totale, nga një këndvështrim praktik, nuk funksionon. Kjo luftë është një dështim.”
Macron tha se fati i pengjeve dhe popullsisë civile të Gazës nuk duhet “t’u lihet atyre për të cilët lirimi i pengjeve nuk është përparësi”. Ai shtoi: “Prioriteti i parë i Netanyahut nuk janë pengjet – përndryshe ai nuk do të kishte nisur ofensivën e fundit në Gaza, as nuk do të kishte synuar negociatorët në Katar.”
Ai theksoi se, si pjesë e planit për qeverinë e ardhshme në Gaza dhe Bregun Perëndimor, Hamasi do të përjashtohej, dhe Autoriteti Palestinez me angazhime të reja për reforma do të merrte përgjegjësinë. Por nuk specifikoi një afat kohor.
Ai paralajmëroi se nëse luftimet nuk ndalen në ditët në vijim, Evropa do të duhet të marrë në konsideratë masa shtesë; kur u pyet nëse kjo do të thotë sanksione, ai u përgjigj: “Padyshim”.
Kur u pyet nëse do të kishte shumicë në BE për sanksione, ai tha se po punonte për ta ndryshuar këtë, duke kujtuar se çdo vend ka historinë dhe ndjeshmëritë e veta – një referencë për Gjermaninë, e cila, së bashku me Italinë, kundërshton sanksionet.
Duke shpjeguar qëndrimin e tij se palestinezëve duhet t’u jepet një perspektivë politike për të ardhmen e tyre, Macron përfundoi: “Nëse nuk u jepni njerëzve një rrugëdalje politike për ekzistencën e tyre legjitime, të cilën bashkësia ndërkombëtare e njohu 78 vjet më parë, atëherë do t’i çoni ata në një humbje të plotë të shpresës – ose, më keq, në dhunë të re”. /tesheshi.com/
