Pekini ka kritikuar ashpër Shtetet e Bashkuara, pasi një luftanije amerikane ka lundruar panë një grupi të ishujve artificialë, që ka ndërtuar Kina në Detin e Kinës Jugore.
Zëdhënësi i Ministrisë së Jashtme, Lu Kang, ka thënë se ky veprim “është kërcënim për sovranitetin e Kinës” dhe është zotuar se Kina do të mbrojë integritetin e saj territorial.
Zyrtarët amerikanë kanë thënë se Shtëpia e Bardhë ka miratuar inkursionin përreth ishujve Spratly, të cilat pretendohen edhe nga Kina, edhe nga Filipinet.
Ata kanë thënë se me këtë veprim, SHBA ka dashur të tregojë se ishujt nuk janë territor sovran, ashtu siç pretendon Kina.
