Ç’sheh presidenti francez dhe ç’propozon?
Presidenti francez Emmanuel Macron pranoi në Dialogun Global të Berlinit se “Bashkimi Evropian mund të vdesë” dhe më pas lëshoi një paralajmërim edhe më të tmerrshëm për situatën ekonomike të vendeve anëtare.
Emmanuel Macron pretendon se Bashkimi Evropian mbirregullon dhe investon shumë pak, dhe se Kina dhe SHBA-të kanë tejkaluar të 27 vendet anëtare për sa i përket rezultateve ekonomike dhe investimeve.
Siç raporton Telegrafi, Macron ka theksuar se “jemi në prag të një momenti shumë të rëndësishëm”.
“Modeli ynë i mëparshëm ka përfunduar. Domethënë, ne rregullojmë në mënyrë të tepruar dhe investojmë shumë pak. Në dy-tre vitet e ardhshme, nëse ndjekim axhendën tonë klasike, ne do të zhdukemi nga tregu”, tha Macron.
Ai u bëri thirrje vendeve anëtare që të vazhdojnë të përpiqen për një “paketë të unionit bankar që synon të sigurojë stabilitetin, sigurinë dhe besueshmërinë e sektorit bankar në eurozonë dhe në të gjithë BE”.
Paralajmërimi i tij vjen pas një tjetër paralajmërimi të lëshuar në një raport nga ish-kryeministri italian dhe ish-shefi i Bankës Qendrore Evropiane Mario Draghi.
Mario Draghi ka thënë se BE-ja nuk mund të konkurrojë e vetme me Kinën dhe Shtetet e Bashkuara dhe se i duhet një treg i vetëm shumë më i integruar për të krijuar biznese pan-evropiane të shkallës së kërkuar globale.
Raporti i Draghit propozon gjithashtu një “strategji industriale për Evropën” më të gjerë, duke përfshirë 800 miliardë euro për të parandaluar që BE të bie më tej pas SHBA-së dhe Kinës.
Përveç çështjeve ekonomike, Macron gjithashtu i bën thirrje BE-së të dalë nga hija e SHBA-së në mbrojtje.
Kujtojmë se në prill lideri francez bëri thirrje për një integrim më të madh në të gjithë Evropën në çështjet e mbrojtjes. Ai paralajmëroi atëherë se BE-ja nuk duhet të bëhet vasal i SHBA-së kur bëhet fjalë për sigurinë.
Në mënyrë të ngjashme, raporti i Draghit thotë se qeveritë e BE-së duhet të shpenzojnë më shumë për projektet e përbashkëta të mbrojtjes. /tesheshi.com/
